ABŞ Federal Ehtiyatlar Sisteminin (FED) son toplantısının dərc olunmuş hesabatına əsasən, tənzimləyici qurumun rəhbərliyi inflyasiyanın 2%-lik hədəf səviyyəsinə enəcəyinə daha əmin olana qədər, faiz dərəcələrini azaltmağı ehtimal etmir.
Dərc edilmiş hesabata əsasən, FED rəhbərliyinin bir sıra üzvləri son toplantıdan sonra, tənzimləyici qurumun hədsiz uzun məhdudlaşdırıcı tədbirləri səbəbindən iqtisadiyyatda zəifləmə riskləri görür. Eyni zamanda, toplantı iştirakçıları faiz dərəcəsində gələcək dəyişikliklərin daxil olan iqtisadi məlumatlardan, perspektivlərdən və risk balansından asılı olacağını qeyd ediblər.
Bundan əvvəl, yanvar toplantısının nəticələrinə əsasən, FED ardıcıl dördüncü dəfə uçot faiz dərəcəsini illik 5.25-5.5% səviyyəsində saxlamışdı. Qeyd etmək lazımdır ki, FED ötən ilin iyul ayında faiz dərəcəsini illik 5.25-5.5%-ə qaldırmışdı. Daha sonra tənzimləyici qurum qeyd etmişdi ki, iqtisadiyyatda maksimum məşğulluğa və uzunmüddətli perspektivdə inflyasiyanın 2%-lik hədəf səviyyəsinə nail olmaq üçün sürətin daha da artırılmasını məqsədəuyğun hesab edir. Lakin o vaxtdan bəri FED faiz dərəcələrini cari səviyyədə saxlayıb. 2022-ci ilin yanvar ayından 2023-cü ilin yayına qədər Amerika mərkəzi bankı sürətlənən inflyasiya ilə mübarizə aparmaq üçün faiz dərəcələrini davamlı olaraq artırırdı.
FED toplantısının nəticələri fonunda, dollar major valyutalar qarşısında ucuzlaşmaqda davam edir. Hal-hazırda EURUSD və GBPUSD valyuta cütlükləri müvafiq olaraq 1.0832 və 1.2642 səviyyələrində ticarət olunurlar. Dollar indeksi (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 103.88 bənd təşkil edir. Qızıl 2030$, “Brent” markalı neft isə 83.30$ səviyyələrində ticarət olunurlar.
Analitiklər Avrozonada illik inflyasiyanın, yekun hesablamaya görə, öncəki ay ilə müqayisədə yanvar ayında 2.9%-dən 2.8%-ə qədər endiyini proqnozlaşdırırlar. Rəsmi məlumatlar bugün “Eurostat” statistika agentliyi tərəfindən Bakı vaxtı ilə saat 14:00-da dərc olunacaq.
Həmçinin gün ərzində açıqlanacaq Avrozonada və Böyük Britaniyada sənaye və xidmət sektorlarında Kompozit Biznes Aktivliyi İndeksi (PMI), ABŞ-da İşsizlik Müavinətı Üzrə Ərizələrin Sayındakı Dəyişikliklər göstəricisi, Xidmət Sektorunda Biznes Aktivliyi İndeksi və Təkrar Mənzil Bazarında Satışların həcmi göstəriciləri investorların diqqət mərkəzində olacaq əsas hadisələrdir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
