Bu gün, yanvarın 23-də Bakı Fond Birjasında (BFB) Maliyyə Nazirliyinin AZ0104001687 ISIN-li, 35 mln. manat həcmində, 364 gün tədavül müddətli dövlət qısamüddətli istiqrazlarının (DQİ) yerləşdirilməsi üzrə hərrac keçirilib. FED.az xəbər verir ki, hərrac zamanı 18 investor tərəfindən 35 sifariş təqdim edilib. Sifarişlərin qiymət intervalı 85.7000 AZN (16.7780%) və 88.9430 AZN (12.5000%) olmuşdur. Sifarişlərin nominal qiymətlə ümumi məbləği 95 291 900,00 AZN olub. Başqa sözlə, istiqrazlara sifarişlər buraxılışdan a0 qala 3 dəfə artıq olub. Nəticədə istiqrazların gəlirliyi 14%i keçməyib.
Maliyyə Nazirliyinin qərarına əsasən istiqrazların kəsmə qiyməti 87.7784 AZN (13.9999%), orta ölçülmüş qiyməti 87.9520 AZN (13.7738%) müəyyən edilib. Hərrac nəticəsində istiqrazlar bütünlüklə satılıb. İstiqrazların ödəmə tarixi – 22 yanvar 2019-cu il. Hərrac iştirakçıları 24 yanvar 2018-ci il (t+1) tarixinədək istiqrazların alışı üzrə öhdəliklərini icra etməlidirlər.
Qeyd edək ki, sonucu hərracda banklarla yanaşı, fiziki şəxslər və sığorta şirkələri də böyük fəallıq göstəriblər. Bu oyunçular banklardan fərqli olaraq Mərkəzi Bankın notları və depozit hərraclarında iştirak edə bilmədiklərinə görə, vəsaitlərini Maliyyə Nazirliyinin istiqrazlarına yerləşdirməyə çalışırlar.
Bu kağızlara tələbatın belə böyük olmasının digər səbəbi istiqrazların yüksək faizlə təqdim edilməsidir. Manatla ildə 13-14%-lə və dövlət zəmanəti ilə yerləşdirilən pullar digər investisiyalardan, hətta real sektora yatırımdan da cəlbedici görünür. Məhz buna görə nazirliyin kağızlarına yüksək tələbat müşahidə edilir. Yeri gəlmişkən, qiymətli kağızlar bazarı üzrə ekspertlər bildirir ki, faizlərin belə yüksək olması bankları öz vəsaitlərini real sektora yönəltməkdən yayındırır. İqtisadi artıma nail olmaq üçün bu faizlər aşağı salınmalıdır.
Maliyyə Nazirliyinin istiqrazlarını «YERƏ DÜŞMƏYƏ» QOYMADILAR
18:01
23 Yan 2018