Tesla-nın satış rəqəmləri gözləntiləri üstələyib
Tesla-nın satışlarında - REKORD
Cümə günü Çin elektrikli avtomobil istehsalçılarının səhmləri Tesla-nın rüblük satış göstəricilərini açıqlamasından sonra əhəmiyyətli dərəcədə ucuzlaşıb. Şirkətin gözləniləndən daha yüksək nəticələri qlobal bazarda rəqabətin artacağına dair narahatlıqları gücləndirib.
FED.az xəbər verir ki, Tesla cümə axşamı bildirib ki, 2025-ci ilin üçüncü rübündə 497 min 99 avtomobil təhvil verib. Bu, analitiklərin proqnozlarını üstələyib və ötən ilin eyni dövrü ilə müqayisədə 7,4% artım deməkdir.
Bununla belə, Tesla-nın səhmləri ucuzlaşıb. Analitiklər bu ucuzlaşmanı - satış artımının əsasən ABŞ-da federal vergi güzəştləri bitməzdən əvvəl müştərilərin alış dalğasından qaynaqlanması ilə izah edirlər.
Çin bazarına yeni Model Y ilə təkan
Tesla sentyabr ayında Çində altı oturacaqlı yeni Model Y variantının təhvilinə başlayıb. Bu model şirkətin ən böyük xarici bazarında satışlarını artırmaq məqsədi daşıyır.
Tesla-nın güclü nəticələri ABŞ istehsalçısının qlobal bazar payını yenidən artıracağı ehtimallarını gücləndirib. Çinli istehsalçılar isə ölkə daxilindəki sərt rəqabət və davam edən qiymət müharibələri fonunda çətinliklərlə üzləşirlər.
Çin EV nəhəngləri dəyər itirib
Tesla-nın açıqlamasından sonra Honq-Konq birjasında Çinin elektrikli avtomobil (Electric Vehicle - EV) istehsalçılarının səhmlərində ucuzalaşma qeydə alınıb.
BYD-nin səhmləri 5%-ə yaxın ucuzlaşaraq ən böyük itkini yaşayıb.
NIO-nun səhmləri 2%, Xpeng-in səhmləri isə 4% dəyər itirib.
Geely Automobile və Li Auto-nın səhmləri qiymətləri də 3%-dən çox geriləyib.
Qlobal rəqabət yeni mərhələyə keçir
Tesla-nın bazarda mövqeyini gücləndirməsi Çin elektrikli avtomobil istehsalçılarını daha aqressiv strategiyalar tətbiq etməyə məcbur edə bilər. Analitiklərin fikrincə, qiymət müharibələrinin davam etməsi və dövlət subsidiyalarının azalması fonunda Çin şirkətləri üçün vəziyyət daha da çətinləşə bilər.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
