Son günlər sürətlə geriləyən kriptovalyuta bazarı özünə gəlməyə başlayıb. FED.az xəbər verir ki, əsas kriptovalyuta sayılan bitkoin son saatlarda sürətlə bahalaşaraq əvvəlki mövqelərinə qayıdır. Belə ki, hələ 1 gün əvvəl, fevralın 6-da 6079 dollara düşən bitkoin 2140 dollar və ya 35%-dən çox bahalaşaraq 8 217 dollara yüksəlib. Doğrudur, cəmi 1 ay əvvəl qiyməti 20 min dollara yüksələn bitkoin üçün bu yüksək qiymət sayılmır, amma son günlər baş verən enişin fonunda qiymət artımı diqqəti cəlb edir.

Təkcə bitkoin deyil, ilk kriptovalyuta bazarının əsasını təşkil edən bütün 100 valyuta da bahalaşıb. Onların arasında eterium 237 dollar və ya 40% a bahalaşaraq 592 dollardan 829 dollara, Ripple isə 0,18 dollar və ya 30% bahalaşaraq 0,59 dollardan 0,77 dollara yüksəlib.

Bahalaşma nəticəsində kriptovalyuta bazarının kapitalizasiyası (yəni bütün kriptovalyutaların ümumi qiyməti) dərhal yüksələrək 286 milyard dollardan 378 milyard dollara qalxıb. Bitkoinin kapitalizasiyası isə 102 milyvrd dolardan 138 milyvrd dollara yüksəldi.

Xatırladaq ki, bitkoinin belə sürətli ucuzlaşması bir neçə səbəblə bağlı idi. Bunlar «Facebook»un reklam siyasətini dəyişərək kriptovalyutaların reklamına qadağa qoyması, Hindistan Maliyyə nazirliyinin rəqəmsal aktivlərlə bağlı mənfi qiymətləndirməsi, eləcə də Çinin kriptovalyutalarla ticarət edən satları bloklayacağı barədə məlumatların yayılması idi. Bütün kriptovalyuta əməliyyatlarının 20%-dən çoxunun Çində həyata keçirildiyini nəzərə alanda, xüsusilə sonuncu amil bazara güclü zərbə vurdu.

İndi isə bazara müsbət təsir edəcək ciddi səbəblər olmasa da qiymətlərin artımı müşahidə edilir. Ekspertlər bu vəziyyəti sadəcə həddən artıq ucuzlaşmaan sonra baş verən bazar korreksiyası sayırlar.
Bitkoini bahalaşdıra bilən digər səbəb də var. Fevralın 5-dən etibarən ABŞ və digər ölkələrin birjalarında səhmlər sürətlə ucuzlaşıb. Fond bazarının əsas indeksi olan «Dow Jones» gün ərzində rekord sürətlə - 1175 pillə və ya 4,6% enərək 25 000 pillədən aşağı düşüb. Görünür, məhz bu dalğalanma, bəzi səhmdarların öz vəsaitlərini kriptovalyatalara keçirməyə vadar edib.