Azərbaycanda koronavirus pandemiyası, iqtisadi çətinliklər və kreditlərin qaytarılmasındakı problemlər daha bir banka problem yaratmağa başlayıb.
FED.az xəbər verir ki, baş verənlər nəticəsində «Bank Avrasiya» 2020-ci ilin ilk yarısını zərərlə başa vurub. Baxmayaraq ki, adətən sakit davranmağa çalışan bank birinci rübü kiçik də olsa mənfəətlə başa vura bilmişdi.
FED.az bankın hesabatına istinadən xəbər verir ki, ümumilikdə ilk yarım ildə «Bank Avrasiya»nın göstəriciləri pis olmayıb. Beləliklə, ilk yarım ildə bankın faiz gəlirləri ötən ilin eyni dövrü ilə müqayisədə ikiqat artaraq 2,7 milyon manatdan 5,4 milyon manata yüksəlib. Artımın böyük hissəsi kreditlərdən daxil olan faiz gəlirlərini çoxalması hesabınadır. Bu göstərici də ikiqat artaraq 2,23 milyon manatdan 4,57 milyon manata yüksəlib.
Bu dövrdə bank qiymətli kağızlardan gəlirlərini də 70% artıraraq 580 min manata çatdırıb.
Amma hesabatı dövrüındə bankın faiz xərcləri də təqribən iki dəfə yüksələrək 550 min manatdan 1035 min manata çatıb.
Faiz xərclərinin artımı depozitə görə ödənişlərin və başqa banklar qarşısında kreditlərə görə faiz ödənişinin yüksəlməsi hesabınadır.
Nəticədə «Bank Avrasiya» ilin ilk yarısını olduqca ümidverici 4,4 milyon manat faiz gəliri ilə başa vurub. Bu ötənilki göstəricidən ikiqat artıq olmaqla yanaşı, «Bank Avrasiya» kimi o qədər də böyük olmayan (1-ci rübdə aktivlərinin həcminə görə, Pakistan və İran bankından sonra axırdan 3-cü yerdə idi) bank üçün kifayət qədər yüksək sayıla bilər.
Maraqlıdır ki, bu dövrdə bankın qeyri-faiz gəlirləri və xərcləri də ikiqat artaraq müvafiq olaraq 771 min manata və 2,3 milyon manata yüksəlib.
Nəticədə bank ilk yarım ili 2,8 milyon manat əməliyyat mənfəəti ilə başa vurub. Bu ötənilki göstəricidlən iki qat artıqdır.
Göründüyü kimi bütün gösğtəriciləri müsbət olan bankın vəziyyətini kredit portfelində yaranan problemlər «korlayıb». Yarım ilin nəticəsi olaraq bankın problemli kreditləri 30%-ə yüksəlib.
Bu vəziyytədlə bank mümkün zərərləri qarşılamaq üçün 4,4 milyon ehtiyat ayırmalı olub ki, bu da əməliyyyat mənfəətini nəinki tamamilə «əridib», hətta 1,6 milyon manat xalis zərərə də səbəb olub. Xatırladaq ki, ötən il bank yarım ili cəmi 145 min manat da olsa mənfəətlə başa vurmuşdu.
İlk yarım ilin nəticəsinə görə, «Bank Avrasiya»nın aktivləri 9 milyon manat və ya 5,4% azalaraq 161,2 milyon manata enib.
Maraqlıdır ki, azalmanın əsas səbəbi bankın qiymətli kağızlara yatırımını kəskin azalması olub. Bu vəsait 12 milyon manat və ya 41% azalaraq 16,8 milyon manata düşüb.
Kredit portfeli isə cəmi 2 milyon manat azalaraq 107,2 milyon manata düşüb. Bankın həm biznes, həm də ipoteka kreditləri azalıb, istehlak kreditləri isə ikiqat artıb.
İlk yarım ildə bankın öhdəlikeləri 7,3% azalaraq 93,4 milyon manata düşüb. Azalmaya səbəb hüquqi şəxslərin depozitlərini geri çəkməsi olub. İlin əvvəlindən bəri «Bank Avrasiya»da hüquqi şəxslərin depozitləri ikiqat azalaraq 14,8 milyon manatdan 7,4 milyon manata enib. Hərçənd, qeyd etmək lazımdır ki, depozitlərin azalması əsasən birinci rübdə baş verib, ikinci rübdə isə bank portfelini 2,5 milyon manat artırıb. Fiziki şəxslərin əmanətləri isə azalmayıb, hətta 1,5 milyon manat artaraq 40,4 milyon manata çatıb.
Bankın kapitalı isə 1,9 milyon manat azalaraq 67,8 milyon manata enib.
