FED.az biznes maliyyə portalı "AFB Bank"ın Maliyyə direktoru (CFO), İdarə Heyəti sədrinin müavini Lalə Quliyevanın müsahibəsini təqdim edir.
Bankın yarımillik nəticələri açıqlandı və görünür ki, əksər göstəricilər üzrə artım müşahidə olunub. Bu artımın səbəbləri nələrlə bağlıdır?
Qeyd etdiyiniz kimi, bankın ilk altı ay üzrə maliyyə nəticələri açıqlanıb və ümumilikdə müsbət dinamika müşahidə olunur. Belə ki, bankımız ötən ilin eyni dövrü ilə müqayisədə 4.3 dəfə artım göstərərək 2.7 milyon manat mənfəət əldə edib. Bu artımın əsas səbəblərindən biri komanda işinin gücləndirilməsi və korporativ idarəetmə prinsiplərinin tətbiqinin genişləndirilməsidir. Əsas məqsədimiz müştəri məmnuniyyətini artırmaq və bankın etibarlı tərəfdaş imicini daha da möhkəmləndirməkdir.
Müştəri məmnuniyyətini artırmaq üçün bank hansı layihələri həyata keçirib?
Əsas hədəfimiz innovativ həllər təqdim etməklə müştəri təcrübəsini yaxşılaşdırmaqdır. Bu məqsədlə rəqəmsal məhsullar istifadəyə verilib ki, bu da müştərilərə vaxt itirmədən, rahat və sürətli bank xidmətlərindən yararlanmağa imkan verir. Ən önəmli layihələrdən biri “başdan-başa” kredit məhsuludur – bu xidmət sayəsində pərakəndə müştərilər banka gəlmədən, tam onlayn şəkildə kredit əldə edə bilirlər.
Bundan əlavə, mobil bank tətbiqimiz üzərində yenilənmə işləri aparılır, yaxın vaxtlarda istifadəyə veriləcək yeni versiya müştəri məmnuniyyətini daha da artıracaq. Həmçinin sahibkarlar və hüquqi şəxslər üçün yenilənmiş internet bankçılıq platforması hazırlanır. Bu təşəbbüslər bankın maliyyə göstəricilərinə də müsbət təsir göstərir.
Maliyyə göstəricilərinə əsasən kredit portfelinizdə 19%-lik artım qeydə alınıb. Bu artım daha çox hansı sahə və müştəri qruplarında müşahidə olunur?
Kredit portfelimizdə demək olar ki, bütün istiqamətlər üzrə artım var. Xüsusilə pərakəndə müştərilərə yönəlmiş innovativ həllər bankımıza marağı artırıb. Bununla yanaşı, bizim üçün əsas prioritetlərdən biri mikro, orta və iri biznes kreditlərinin inkişafıdır. Nəticə olaraq, orta və iri biznes kreditlərində 40%, mikro kreditlərdə isə 2.5 dəfə artım qeydə alınıb. Bu artımda peşəkar komandamızın rolu böyükdür – məqsədyönlü şəkildə yeni mütəxəssislər komandamıza cəlb olunub.
Müddətli əmanət portfelində 50%-dən çox artım müşahidə olunub. Bu, müştəri inamının göstəricisidir. Bu inamı necə əldə etdiniz və qoruyursunuz?
Bank olaraq yalnız məhsul satışına deyil, xidmət keyfiyyəti və müştəri təhlükəsizliyinə də böyük önəm veririk. Bu yanaşma nəticəsində müştəri bazamız genişlənib və banka qoyulan müddətli əmanətlərin həcmi əhəmiyyətli şəkildə artıb. Yüksək xidmət səviyyəsi və istifadəçi dostu bankçılıq həlləri müştəri inamını davamlı olaraq gücləndirir.
Bankın kapital adekvatlıq göstəricilərinin yüksək olması bazar mövqeyinizə necə təsir edir?
Hazırda həm məcmu, həm də I dərəcəli kapital üzrə adekvatlıq göstəricilərimiz Mərkəzi Bankın minimum tələblərindən xeyli yüksəkdir. Belə ki, məcmu kapital üzrə tələb 10% olduğu halda bizdə bu göstərici 33.97%, I dərəcəli kapital üzrə isə 5% minimum tələblə müqayisədə 31.77% təşkil edir. Bu, bankın maliyyə dayanıqlığını və risklərə qarşı davamlılığını nümayiş etdirir və bazar mövqeyimizin güclənməsi üçün sabit zəmin yaradır.
2025-ci ilin ilk yarısında AFB Bank-ın ROA və ROE göstəriciləri ötən ilin eyni dövrü ilə müqayisədə 4 dəfədən çox artıb. Bu rentabellik artımına səbəb olan amillər hansılardır?
Doğrudur, 2025-ci ilin ilk altı ayı ərzində həm ROA (aktivlərin gəlirliliyi), həm də ROE (kapitalın gəlirliliyi) göstəricilərində ciddi artım qeydə alınıb. Bu nəticələr yalnız maliyyə göstəricilərinin yaxşılaşması ilə deyil, daxili idarəetmə proseslərinin optimallaşdırılması, risklərin effektiv idarə olunması, xərclərin azaldılması və gəlir mənbələrinin şaxələndirilməsi ilə birbaşa əlaqəlidir.
Bundan başqa, müştəriyönümlü yanaşma və innovativ məhsulların təqdimatı kredit portfelimizin və komissiya gəlirlərimizin artmasına səbəb olub. Bu göstəricilər bankın gələcək dayanıqlı inkişafını da təmin edən əsas amillərdir.
Yekun olaraq:
AFB Bank olaraq fəaliyyətimizin mərkəzində dayanıqlı inkişaf, müştəri məmnuniyyəti və peşəkar idarəetmə prinsipləri dayanır. Gələcək dövrdə də bu dəyərlərə əsaslanaraq bazar mövqeyimizi gücləndirmək və yenilikçi yanaşmalar tətbiq etməklə müştərilərimizin inamını daha da artırmaq əsas hədəfimizdir. (bbn)
