Prezident İlham Əliyevin aqrar kreditlərlə bağlı imzaladığı Fərman fermerlərə daha asan kredit almağa imkan verəcək.
FED.az xəbər verir ki, bunu Kənd Təsərrüfatı Nazirliyi (KTN) yanında Aqrar Kredit və İnkişaf Agentliyinin (AKİA) sədri Mirzə Əliyev deyib. Onun sözlərinə görə, yeni mexanizm fermerlərə girovsuz mikrokreditlər vermək imkanı yaradır.
«Məlum olduğu kimi, kənd təsərrüfatında çalışan fermerlərin təxminən 80 faizi kiçik və orta ailə-kəndli təsərrüfatlarına aid edilən fermerlərdir. Onların istifadəsində ümumilikdə 230 min hektar torpaq sahəsi var. Bu fermerlərin maliyyəyə çıxışı əsasən dövlət tərəfindən onlara ayrılan subdsidiyalar, güzəştli kreditlər və müxtəlif banklar tərəfindən təqdim olunan kommersiya kreditləri formasındadır. Ümumi mənəzərəyə nəzər yetirdikdə görürük ki, bu sahədə təxminən 60 milyonluq bir kredit portfeli var və bu kateqoriyadan olan fermerlərə ilindən asılı olaraq 40-45 milyonluq subsidiya verilir. Lakin fermerlərimizin əlavə olaraq 140 milyonluq vəsaitə ehtiyacı var. Bu ehtiyac yeni yaradılmış maliyyə instrumentləri vasitəsilə maliyyələşdirilə bilər. Məhz bu məqsədlə dövlət başçısı tərəfindən düzgün qərar verilərək AKİA-nın həm Əsasnaməsinə, həm də vəsaitdən istifadə qaydalarına dəyişiklik olunub».
AKİA sədri qeyd edib ki, bu Fərman fermerlərə 15 min manatadək girovsuz mikrokredit götürmək imkanı yaradır: «Mexanizmə əsasən fermerlərə orta bazar qiymətlərindən iki dəfə aşağı faiz dərəcəsi ilə mikrokreditlər verilə bilər. Mikrokreditlərin maksimal dərəcəsi 12 faiz ola bilər. Əvvəllər bu cür kreditlərin orta müddəti 1-2 il idi, indi isə kreditlərin ödənilməsinin maksimal müddəti 3 ilədək artırılıb».
Mexanizmin bir tərəfi bu sahəyə vəsait ayıran dövlət, bir tərəfi mikrokreditlərə tələbatı olan fermerlərə, üçüncü tərəfi isə prosesdə iştirak edən banklardır. AKİA sədri bildirib ki, bu məhsulu banklar üçün cəlbedici edən əsas məqam fermerlərin bank üçün yarada biləcəyi riskləri dövlətin qismən qarşılamasıdır. Banklara ucuz vəsaitə çıxış verilməsi, risklərin dövlət tərəfiondən qismən qarşılanması bu məhsulu həm banklar, həm fermerlərimiz üçün cəlbedici edir».
AKİA sədrinin sözlərinə görə, kənd təsərrüfatının mövsümi fəaliyyət olduğunu nəzərə alaraq mikrokreditlərin ödənilməsi üçün güzəşt müddətləri də nəzərdə tutulub: “Mikrokreditlər üçün istiqamətindən asılı olaraq 1 ilə qədər güzəşt müddəti də nəzərdə tutulub. Eyni zamanda sənədləşmədə sürətli keçid mexanizmləri hazırlanıb ki, bu da fermerlərin maliyyəyə çıxışını əhəmiyyətli dərəcədə asanlaşdıracaq».
