Bu ildən Azərbaycanda ilk təcrübə kimi pambığın innovativ texnologiya ilə əkini və becərilməsi həyata keçiriləcək.
FED.az Kənd Təsərrüfatı Nazirliyinə istinadən xəbər verir ki, bu barədə qurumun Təhsil-təlim şöbəsinin müdiri İmran Cümşüdov məlumat verib.
O, bu barədə Nazirliyin Aqrar Elm və İnnovasiya Mərkəzinin Bitki Mühafizə və Texniki Bitkilər İnstitutunun Ucar rayonundakı Şirvan Təcrübə Stansiyasının torpaq sahəsində fermerlər üçün pambığın innovativ texnologiya ilə əkini və becərilməsinə həsr olunan seminarda danışıb.
Nazirlik rəsmisinin sözlərinə görə, bu gün burada 10 hektar sahədə Çin texnologiyası əsasında pambıq əkininə hazırlıq işləri görülür: “Bizim ənənəvi əkin və becərmə üsullarından fərqli olaraq sahə lazer mala ilə hazırlanıb. Damcılı suvarma sistemi qurulacaq. Cərgə arası 90 santimetr olmaqla 2 sırada əkin aparılacaq ki, hər hektarda 200-220 min bitki olacaq. Bizim ənənəvi üsulla apardığımız əkində isə 100-110 min bitki olur. Yeni texnologiya ilə fermer hər hektardan 50-60 sentner məhsul götürə biləcək. Halbuki, bizdə bu rəqəm 16-17 sentner olur”.
Kürdəmir, Ucar, Ağsu, Ağcabədi, Zərdab və Yevlax bölgələrindən pambıqçılıqla məşğul olan 40 nəfərədək fermerin, rayonların Dövlət Aqrar İnkişaf Mərkəzlərinin direktorlarının iştirak etdikləri tədbirdə kənd təsərrüfatı nazirinin müşaviri Şöhrət Vəkilov, bitkiçiliyin təşkili və monitorinq şöbəsinin müdiri Rəfail Quliyev, habelə Çindən gələn mütəxəssislər - Lin Xinan, Tu Qinan və Vung TianZuo yeni texnologiyanın üstünlükləri barədə danışıblar.
Seminarda sahənin lazer mala ilə hazırlanması əməliyyatı nümayiş olunub. Hazırda Çində tətbiq edilən bu texnologiyanın üstünlükləri barədə məlumat verilərək bildirilib ki, lazer malalama torpağın təkrar şoranlaşmasının qarşısını alır, suya qənaət olunur, toxumların bərabər səviyyədə çıxmasına şərait yaradır. Nəticədə isə məhsuldarlıq artır.
Seminarda yeni texnologiyanın tətbiqi ilə əlaqədar fermerlərin sualları mütəxəssislər tərəfindən ətraflı cavablandırılıb.
