Azərbaycanda internet telekommunikasiya xidməti göstərən operatorlar və provayderlər tərəfindən uçota durma qaydalarının pozulmasına və internet informasiya ehtiyatında yayılması qadağan edilən infromasiyanın yerləşdirilməsi, belə informasiyaların yerləşdirilməsinin qarşısının alınmamasına görə, məsuliyyət müəyyən edilir.
FED.az xəbər verir ki, Trend-in məlumatına görə, bununla bağlı Milli Məclisin Mədəniyyət Komitəsinin sədri Rafael Hüseynov komitənin bu gün keçirilən iclasında məlumat verib.
O bildirib ki, “Telekommunikasiya haqqında” qanuna və İnzibati Xətalar Məcəlləsinə dəyişikliklərin edilməsi təklif edilir.
Onun sözlərinə görə, “Telekommunikasiya haqqında”a qanuna yeni bənd əlavə edilir. Bu əlavəyə görə, host provayder və internet provayderlər internet informasiya ehtiyatlarında yayılması qadağan edilən informasiyanın yerləşdirilməsinin qarşısının alınması üçün “İnformasiya, informasiyalaşdırma və informasiyanın mühafizəsi haqqında” nəzərdə tutulmuş tədbirlər həyata keçirməlidirlər.
İnzibati Xətalar Məcəlləsinə təklif edilən internet informasiya ehtiyatında yayılması qadağan edilən informasiyanın yerləşdirilməsi, habelə belə informasiyaların yerləşdirilməsinin qarşısının alınmamasına görə, fiziki şəxslər 500 manatdan 1000 manatdək, hüquqi şəxslər 1500 manatdan 2000 manatdək, vəzifəli şəxslər 1000 manatdan 1500 manatadək cərimə ediləcəklər.
İnternet informasiya ehtiyatı “Yayılması qadağan edilən infromasiyanın yerləşdirildiyi informasiya ehtiyatlarının Siyahı”sına daxil edildikdən dərhal sonra host provayder və internet provayderlər tərəfindən həmin internet informasiya ehtiyatına müraciətin məhdudlaşdırılmasına görə, vəzifəli şəxslər 1500 manatdan 2000 manatdək, hüquqi şəxslər 2000 manatdan 2500 manatdək cərimələnəcəklər.
