30 tələbə Norm Sement zavodunda 2024-cü ilin “İstehsalat Təcrübəsi Proqramı”nı uğurla başa çatdırıb.
FED.az xəbər verir ki, bu münasibətlə zavodda proqramın bağlanış mərasimi keçirilib. Mərasimdə Bakı Mühəndislik Universiteti, Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti, Bakı Ali Neft Məktəbi, Azərbaycan Dövlət İqtisad Universiteti və Sənaye və İnnovasiyalar üzrə Peşə Təhsili Mərkəzinin nümayəndələri iştirak ediblər.
Mərasim boyunca təcrübəçilərin, eləcə də Bakı Mühəndislik Universitetinin Təcrübə şöbəsinin rəhbəri Həzi Qasımovun, Sənaye və İnnovasiyalar üzrə Peşə Təhsili Mərkəzinin Tədris üzrə direktor müavini Xalidə Hümbətovanın, Azərbaycan Dövlət İqtisad Universitetinin Təcrübənin təşkili şöbəsinin müdiri Leyla Nəzirzadənin, Azərbaycan Memarlıq və İnşaat Universitetinin dosenti Rəşid Rəcəbin, Azərbaycan Dövlət Neft və Sənaye Universitetinin Təcrübə üzrə mütəxəssisi Zümrüd Hüseynovanın çıxışları olub.
Ötən ilin noyabr ayında elan olunan proqrama 400-ə yaxın sonuncu kurs tələbəsi müraciət etmişdi. Onlardan 100-ə yaxın tələbə müsahibə əsaslı müsabiqə mərhələsinə dəvət olunmuşdular. Bütün mərhələləri uğurla tamamlayan 30 tələbə ixtisaslarından asılı olaraq, 1 aydan 3 aya kimi Norm Sement zavodunda təcrübə keçmək imkanı əldə etmişdi. Həmçinin, Sənaye və İnnovasiyalar üzrə Peşə Təhsili Mərkəzi ilə birlikdə təşkil olunan “SƏTƏM və Ekologiyanın” əsasları adlı təlim proqramını uğurla başa çatdırmış 7 tələbə bu ilin fevral – iyun aylarında zavodda təcrübə keçmək şansı qazanmışdı.
Qeyd edək ki, “Norm” ASC gənclərin inkişafına dəstək göstərmək məqsədilə hər il müxtəlif layihələr həyata keçirir. Şirkət 10-dan çox ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupu olan NEQSOL Holding-in tərkibinə daxildir.
