Nərimanov Rayon Məhkəməsində “Sun Food” MMC-nin cərimə edilməsi ilə bağlı protokol üzrə qərar çıxarılıb.
FED.az xəbər verir ki, Maliyyə Bazarlarına Nəzarət Palatası şirkətə İnzibati Xətalar Məcəlləsinin (İXM) 430.4-cü maddəsinə əsasən protokol yazıb.
Eləcə də bax: Əmək Müfəttişliyi iş adamlarına - MÜRACİƏT EDİB - CƏRİMƏLƏNƏ BİLƏRSİNİZ
Qeyd edək ki, İXM-in 430.4-cü maddəsi avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə məsuliyyəti nəzərə tutur.
Bu inzibati xətaya görə, vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.
Məhkəmənin qərarından verilən şikayətə Bakı Apellyasiya Məhkəməsində baxılır.
“Sun Food” MMC qida sektorunda aparıcı şirkətlər qurupu olan “Azərsun Holdinq”ə daxil olan şirkətlərdən bidirir. Şirkət Azərbaycanın ən böyük 10 ixracatçı şirkətlərindən biridir.
1991-ci ildə Azərbaycanda fəaliyyətə başlayan “Azərsun Holdinq” MMC qida istehsalı, pərakəndə satış və kənd təsərrüfatı sahəsində fəaliyyət göstərir.
Xəbər verdiyimiz kimi, Azərbaycanın sərt valyuta qanunvericiliyi ölkəyə mallar, avadanlıqlar idxal edən sahibkarlara və şirkətlərə qarşı ciddi maliyyə sanksiyaları tətbiq etməyə əsas verir.
Əlavə edək ki, qanunla xaricə çıxarılan vəsaitə nəzərdə tutulan müddətdə hər hansı mal alınaraq, ölkəyə idxal olunmadıqda sanksiya tətbiq olunur. Bununla da ölkədən külli miqdarda vəsaitin qanunsuz yolla çıxarılmasının qarşısının alınması məqsədi güdülür.
Report.az
