Banner

Dövlət

Süni qiymət artımı xəyanət sayılacaq – PREZİDENTDƏN XƏBƏRDARLIQ

Süni qiymət artımı xəyanət sayılacaq – PREZİDENTDƏN XƏBƏRDARLIQ | FED.az
16:12 6 Aprel 2020

Prezident İlham Əliyev ticarət müəsssələri və apteklərdə maska və tibbi maddələrin qiymətini süni şəkildə artıranlara xəbərdarlıq edib.

Sumqayıtda maska istehsalı müəssisəsinin açılışında iştirak edən prezident bildirib ki, hazırda dünyanın bir çox ölkələrində tibbi maska çatışmazlığı var: «O cümlədən Azərbaycanda və biz bu sahədə daim idxaldan asılı idik. Amma indiki şəraiti nəzərə alaraq qısa müddətdə, cəmi iki həftə ərzində yerli istehsal təşkil edildi. Burada sahibkarların böyük rolu vardır, eyni zamanda, Azərbaycan dövləti də öz maliyyə dəstəyini göstərmişdir. Beləliklə, qısa müddət ərzində yeni müasir istehsalat sahəsi yaradılmışdır və bu, bizə imkan verəcək ki, özümüzü tibbi maskalarla böyük dərəcədə təmin edək».

Prezident bildirib ki, koronavirusla mübarizədə maskalara tələbat artdığına görə, dünyanın bir çox ölkələrində bu sahədə problemlər yaşanır: «Azərbaycanda da qıtlıq yaranmışdır və bəzi hallarda apteklərdə tibbi maskalar yoxdur. Ona görə bu istehsal bizə imkan verəcək ki, özümüzü təmin edək və koronavirusla mübarizə başa çatandan sonra da Azərbaycan artıq idxaldan asılı olmayacaq».

Dövlət başçısı bildirib ki, Azərbaycanda artıq dezinfeksiya vasitələrinin istehsalı da təşkil edilib: «Bu da qısa müddət ərzində ərsəyə gəlmiş bir məsələdir. Amma burada üstünlüyümüz ondan ibarət idi ki, ölkəmizdə bir neçə spirt zavodu var və bu spirt zavodlarında dezinfeksiya vasitələri istehsal edilməyə başlanmışdır və artıq satışa verilir. Beləliklə, mübarizəni daha da səmərəli şəkildə aparmaq üçün dəfələrlə qeyd olunub ki, vətəndaşlar daha da məsuliyyətli olmalıdırlar və şəxsi gigiyenasına fikir verməlidirlər. Ancaq bunu təmin etmək üçün vasitələr olmalıdır və bu gün bu vasitələr artıq bazara təqdim edilir – tibbi maskalar və dezinfeksiya vasitələri».

Prezident bildirib ki, maska və yerli digər istehsal başlayandan sonra qiymətləri artırmaq xəyanət kimi qiymətləndiriləcək: «İndi əsas məsələlərdən biri də odur ki, apteklərdə və digər ticarət yerlərində süni qiymət artımı olmasın. Çünki maska qıtlığı artıq süni qiymət artımına da gətirib çıxarmışdır və bəzi hallarda maskaları altdan satırdılar. Bu hallara qətiyyən yol vermək olmaz və müvafiq dövlət qurumları çox ciddi nəzarət mexanizmi tətbiq etməlidirlər. Əgər süni qiymət artımı olarsa, bu işdə əli olan şəxslər ciddi cəzalandırılacaq. Çünki indiki pandemiya şəraitində belə addımlar xəyanət kimi qəbul ediləcək».

Digər xəbərlər

Banner