Bugün ABŞ prezidenti Donald Trampın yeni tariflər barədə açıqlaması ərəfəsində dollar major valyutalar qarşısında bir qədər bahalaşıb.
Trampın çərşənbə günü ticarət kəsirini azaltmaq və ölkənin emal sənayesi sektorunda əmək bazarını canlandırmaq məqsədi daşıyan yeni idxal tarifləri paketini açıqlayacağı gözlənilir. Lakin, treyderlər və ekspertlər bu tədbirlərin ölkədə inflyasiyanı sürətləndirəcəyindən ehtiyat edirlər.
Ötən gün ərzində EUR/USD valyuta cütlüyü 1.08300 səviyyəsindən 1.07780 səviyyəsinə qədər eniş göstərib. Eyni dövr ərzində GBP/USD cütlüyü isə 1.28790 həddini aşağıya doğru test edib. USD/JPY cütlüyü Yaponiyada Tankan İndeksinin dərc olunması fonunda ilk öncə 148.970 səviyyəsinə qədər ucuzlaşıb, sonra isə bahalaşaraq 149.940 səviyyəsinə qədər yüksəlib.
Mərkəzi banklar tərəfindən aktiv qızıl alışları və ABŞ-ın proteksionist siyasətinin yaratdığı geosiyasi və iqtisadi qeyri-müəyyənlik dəstəyi ilə dəyərli metalın qiyməti tarixi rekord səviyyəsini yenilədi. Ötən gün qızılın spot qiyməti 3148$ həddinə qədər bahalaşıb. ABŞ prezidentinin Rusiya və İrana qarşı səsləndirdiyi fikirlər fonunda “Brent” markalı neftin qiyməti dünən 75.10$-a qədər bahalaşıb.
Çərşənbə axşamı günü “Eurostat” tərəfindən dərc olunan məlumatlara əsasən, mart ayında Avrozonada istehlak qiymətləri illik ifadədə 2.2% artıb. Ərzaq məhsulları və enerji daşıyıcıları nəzərə alınmadan hesablanan İstehlak Qiymətlərinin Baza İndeksi (Core CPI ) mart ayında 2.4%-ə qədər geriləyib. Bu, 2022-ci ilin yanvar ayından bəri ən aşağı göstəricidir. Aylıq ifadədə istehlak qiymətləri martda 0.6% artıb.
Həmçinin, fevral ayında Avrozonada İşsizlik Səviyyəsi 6.2%-dən 6.1%-ə qədər enib. Qeyd etmək lazımdır ki, bu, hesablamaların aparıldığı dövr ərzində ən aşağı göstəricidir. Avrozonanın Sənaye Sektorunda Biznes Aktivliyi İndeksi (PMI) isə, təqdim olunan yekun məlumatlara əsasən, mart ayında 47.6 bənd səviyyəsindən 48.6 bənd səviyyəsinədək yüksəlib.
“S&P Global”-ın verdiyi məlumata əsasən, ABŞ-ın Sənaye Sektorunda Biznes Aktivliyi İndeksi fevral ayı ilə müqayisədə mart ayında 52.7 bənd səviyyəsindən 50.2 bənd səviyyəsinədək geriləyib. Ölkənin Təchizat Menecmenti İnstitutu (Institute for Supply Management, ISM) tərəfindən açıqlanan məlumatlarda isə sənaye sektorunda PMI-ın 50.3 bənddə 49 bəndədək endiyi qeyd olunub.
Bugün investorların diqqət mərkəzində ABŞ prezidenti Donald Trampın Bakı vaxtı ilə saat 23:00-da baş tutacaq çıxışı olacaq. Eləcə də, Amerikada dərc olunacaq Qeyri-kənd Təsərrüfatı Sektorunda Yeni Yaranan İş Yerlərinin Sayı (ADP) və Sənaye Sektorunda Sifarişlərin Həcmi göstəriciləri də bazar iştirakçıları tərəfindən diqqətlə izləniləcək.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
