Çərşənbə günü ABŞ-da Qeyri-kənd Təsərrüfatı Sektorunda Yeni Yaranan İş Yerlərinin Sayı göstəricisinin proqnozların altında dərc olunması fonunda avro və funt sterlinqin dollar qarşısında artım tendensiyası davam edib.
Belə ki, EUR/USD və GBP/USD valyuta cütlükləri bugün səhər saatlarında müvafiq olaraq 1.08200 və 1.29080 səviyyələrini test ediblər. Həmçinin, EURGBP cütlüyü yanvarın sonundan bəri ilk dəfə 0.83830 həddinə qədər yüksəlib.
Qızılın beynəlxalq birjalarda qiyməti cari həftənin əvvəlindən 2894$-2930$ aralığında dalğalanmaya davam edir. Hazırda dəyərli metal 2916$-a ticarət olunur. ABŞ-da kommersiya məqsədli neft ehtiyatlarının 28 fevral tarixində bitən həftə üçün 3.614 million barrel artması “qara qızıl”-ın qiymətinin bir qədər artmasına səbəb oldu. “Brent” markalı neftin bir barrel üçün dəyəri ötən gün 70.00$ həddini aşağıya doğru qıraraq 68.60$ səviyyəsinə qədər azalıb. Lakin xəbər açıqlandıqdan sonra qiymət 70.00$-a qədər yüksəlib. “Bitcoin”-ın dəyəri isə artmağa davam edir və artıq 92500 səviyyəsinə qədər çatıb.
Ötən gün Automatic Data Processing (ADP) şirkətinin təqdim etdiyi hesabata əsasən, fevral ayında ABŞ-ın Qeyri-kənd Təsərrüfatı Sektorunda Yeni Yaranan İş Yerlərinin Sayı 77 min təşkil edib. Analitiklər göstəricinin 141 min səviyyəsində açıqlanacağını proqnozlaşdırmışdılar. Həmçinin, “S&P Global” tərəfindən açıqlanan ölkənin Xidmət Sektorunda Biznes Aktivliyi İndeksi 52.9 bənd səviyyəsindən 51 bənd səviyyəsinə qədər zəifləyib. Lakin, ISM tərəfindən dərc olunan xidmət sektorunda PMI 52.8 bənddən 53.5 bəndədək yüksəlib.
Eləcə də, “S&P Global”-ın təqdim etdiyi hesabata əsasən, Avrozonanın Xidmət Sektorunda Biznes Aktivliyi İndeksi (PMI), yekun qiymətləndirməyə əsasən, yanvar ayı ilə müqayisədə fevral ayında 51.3 bənd səviyyəsindən 50.6 bənd səviyyəsinə qədər geriləyib. Analitiklər göstəricinin 50.7 bəndədək zəifləyəcəyini proqnozlaşdırmışdılar. Almaniyanın xidmət sektorunda aktivlik 52.5 bənddən 51.1 bəndədək zəifləyib, Böyük Briyaniyada isə 50.8 bənddən 51.1 bəndədək artıb.
Bugün əksər investorların maraqla izlədiyi əsas hadisə Bakı vaxtı ilə saat 17:15-də Avropa Mərkəzi Bankının (ECB) faiz dərəcəsi ilə bağlı qərarı olacaq. Ekspertlər tənzimləyici qurumun göstəricini 2.90%-dən 2.65%-ə qədər enəcəyini proqnozlaşdırırlar. Əlavə olaraq, baş tutacaq Avropa İttifaqı (Aİ) liderlərinin sammiti və ABŞ-da açıqlanacaq İdxal, İxrac və Ticarət Saldosu göstəriciləri bazar iştirakçılarının diqqət mərkəzində olacaq.
Məlimat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
