Ötən gün açıqlanan statistik məlumatlar fonunda dollar major valyutalar qarşısında öz mövqelərini qoruyub saxlaya bilib. Yeni Zelandiya Ehtiyatlar Bankı faiz dərəcəsi ilə bağlı qərarını açıqladıqdan sonra NZD/USD valyuta cütlüyü 0.6134 səviyyəsindən 0.6075 səviyyəsinə qədər eniş tendensiyasını davam etdirib. Dünən qızılın qiyməti 2605$-a qədər ucuzlaşıb, lakin, bugün səhər bir qədər bahalaşaraq 2620$ səviyyəsində ticarət olunur. Neftin qiyməti isə 5% ucuzlaşaraq 76.8$-a qədər kəskin eniş sərgiləyib.
Çərşənbə günü Yeni Zelandiyanın mərkəzi bankı əsas faiz dərəcəsini 50 baza bəndi azaldıb və inflyasiyanın hədəf səviyyəsinə qayıtmasına baxmayaraq, monetar siyasətin məhdudlaşdırıcı olaraq qaldığını bildirib. Tənzimləyici qurumun uçot dərəcəsini 5.25%-dən 4.75%-ə qədər endirmək qərarı analitiklərin proqnozları ilə üst-üstə düşdü. Bu qərarın fonunda Yeni Zelandiya dolları ABŞ dolları qarşısında 0.6% ucuzlaşdı.
Çərşənbə axşamı günü verilən məlumata əsasən, 2024-cü ilin iyul ayı ilə müqayisədə avqust ayında ABŞ-ın Ticarət Saldosunda kəsir 10.8% azalaraq 70.4 milyard dollar təşkil edib. Analitiklər isə orta hesabla 70.10 milyard dollara qədər azalmanın olacağını ehtimal edirdilər. Avqust ayında ixrac həcmi 5.3 milyard dollar (2%) artaraq rekord həddə - 271.8 milyard dollar səviyyəsinə çatıb. İdxal isə 3.2 milyard dollar (0.9%) azalaraq 342.2 milyard dollar təşkil edib.
Almaniyada Sənaye Sektorunda İstehsal Həcmi iyul ayı ilə müqayisədə avqust ayında 2.9% artıb. Yaponiyada isə illik ifadədə Şəxsi Ev Təsərrüfatlarının Xərcləri avqust ayında 2023-cü ilin eyni ayı ilə müqayisədə 1.9% azalıb. Analitiklər 2.6%-lik azalmanın olacağını proqnoz edirdilər. Ölkənin cari əməliyyatlar hesabının profisiti (mövsümi düzəlişlər olunmadan) avqust ayında 3.80 trilyon yen təşkil edib.
Bugün investorların diqqət mərkəzində olacaq əsas hadisə Bakı vaxtı ilə saat 22:00-da FED-in Federal Açıq Bazarlar Komitəsinin toplantı protokollarını dərc etməsi olacaq. Həmçinin, Almaniyada dərc olunacaq Ticarət Saldosu göstəricisi və ABŞ-da kommersiya məqsədli neft ehtiyatlarına dair rəqəmlər bazar iştirakçılarının maraqla gözlədikləri xəbərlərdir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
