Cümə axşamı günü ABŞ-da statistik məlumatların açıqlanması fonunda EUR/USD valyuta cütlüyü ilk öncə 1.1140 səviyyəsindən 1.1188 səviyyəsinə qədər kəskin bahalaşsa da, sonra bir qədər ucuzlaşıb və hal-hazırda 1.1160 səviyyəsində ticarət olunur. Yen təzyiq altında qalmağa davam edir. USDJPY cütlüyü sentyabr ayının 2-dən bəri ən yüksək həddinə çatıb. Belə ki, valyuta cülüyü ötən gündən indiyə qədər 144.100 həddindən 146.470 həddinə qədər bahalaşıb.
Ötən gün İsveçrə Mərkəzi Bankı uçot faiz dərəcəsinin 25 baza bəndi azaldaraq 2023-cü ilin əvvəlindən bəri ən aşağı səviyyə olan 1.00% həddinə qədər endirdi. Eləcə də, “GfK” araşdırma şirkətinin verdiyi məlumata əsasən, Almaniya iqtisadiyyatına İstehlakçıların İnam İndeksi oktyabr ayında -21.9 bənd səviyyəsindən -21.2 bənd səviyyəsinə qədər artıb.
Verilən rəsmi məlumatlara əsasən, ABŞ iqtisadiyyatı ikinci rübdə böyüyüb və bu, əsasən istehlak xərcləri ilə bağlıdır. Ölkənin Ticarət Departamenti cümə axşamı yekun məlumatlara istinadən bildirib ki, 2024-cü ilin ikinci rübündə ABŞ-ın ÜDM-i bir əvvəlki ilin eyni dövrü ilə müqayisədə 3.0% artıb. Göstərici analitiklərin proqnozları ilə üst-üstə düşüb. Birinci rüb üzrə göstərici yenilənib və artım tempi 1.4%-dən 1.6%-ə yüksəldilib.
Həmçinin, ötən həftə üzrə ABŞ-da İşsizlik Müavinəti üçün Müraciətlərin Sayı 222 mindən 218 minə qədər azalıb. Ekspertlər isə göstəricinin 224 minə qədər artacağını proqnozlaşdırmışdılar. Əlavə olaraq, ölkədə uzunmüddətli istifadə üçün nəzərdə tutulmuş məhsulların istehsal həcmi iyul ayı ilə müqayisədə avqust ayında dəyişməyib.
“Bitcoin” (BTC) məzənnəsi 65000$ həddini keçib. 26 sentyabr axşamı aktivin qiyməti avqustun əvvəlindən bəri ilk dəfə olaraq 65840$ səviyyəsinə çatıb. Kriptovalyuta bazarının kapitallaşması bir gün ərzində 0.4% artaraq 2.38 trilyon dollar təşkil edib. Təkcə “Bitcoin”-ın ümumi bazar dəyəri 24 saat ərzində demək olar ki, 20 milyard dollar həcmində artıb.
Bugün ABŞ-da şəxsi xərclərlə bağlı dərc olunacaq statistik məlumatlar investorların diqqət mərkəzində olacaq. Analitiklərin fikrincə, Amerika əhalisinin şəxsi xərcləri iyul ayı ilə müqayisədə, avqust ayında 0.3% artıb. Həmçinin, ölkənin ticarət saldosu göstəricisi açıqlanacaq. Əlavə olaraq, Almaniyada işsizlik səviyyəsinə dair rəqəmlər dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
