Çərşənbə axşamı günü ABŞ Federal Ehtiyatlar Sisteminin sədri Cerom Pavelin çıxışından sonra dollar major valyutalar qarşısında bir qədər bahalaşıb. Lakin, bugün səhər saatlarında dollar öz mövqelərini bir qədər itirib. EURUSD valyuta cütlüyü 1.0806 həddindən 1.0810 həddinə qədər, GBPUSD cütlüyü isə 1.2778 həddindən 1.2793 həddinə kimi bahalaşıb. USDJPY valyuta cütlüyü 161.430 səviyyəsində ticarət olunur. Dollar indeksi 0.09% artaraq 105.1 bənd təşkil edib.
Dünən Pavel öz çıxışında inflyasiyanın 2%-ə doğru hərəkət edəcəyinə daha çox inamı olana qədər FED-in faiz dərəcəsini aşağı salınmasının məqsədəuyğun olmadığını təsdiqləyib və həmçinin qeyd edib ki, birinci rüb üçün məlumatlar demək olar ki, bir əminlik vermir. Eyni zamanda, mərkəzi bank rəhbərinin sözlərinə görə, son statistik məlumatlar bu sahədə “mülayim irəliləyişdən” xəbər verir. Bundan əlavə, Pavel qeyd edib ki, bütövlükdə, əmək bazarı pandemiyadan əvvəlki səviyyəyə qayıdıb və ABŞ iqtisadiyyatı güclü templə inkişaf edir.
Analitiklər hesab edirlər ki, FED sədrinin açıqlamaları Mərkəzi Bankın sentyabr ayında faizləri aşağı salacağı ilə bağlı gözləntiləri dəstəkləyir.
ABŞ fond indeksləri “Nasdaq” və “S&P 500” yarımkeçirici və texnoloji nəhənglərin səhmlərinin qazancları sayəsində rekord həddə çatıblar. Həmçinin, baazar iştirakçıları FED sədri Cerom Pavelin ABŞ Konqresindəki çıxışını diqqətlə təhlil edirlər. “Nvidia” səhmlərinin dəyəri 3.1% artıb. “Micron Technology” 1.8% bahalaşaraq “Philadelphia SE Semiconductor Index”-ni bütün zamanların ən yüksək səviyyəsinə çatdırıb.
Qızılın qiyməti dünən axşam saatlarında İsrail və “HƏMAS” arasında aparılan danışıqlarda irəliləyişlə bağlı xəbərlərdən sonra bir qədər ucuzlaşsa da, bugün səhər bahalaşıb. Nyu-York “Comex” birjasında avqust ayı üzrə qızıl fyuçerslərinin qiyməti 1 troy unsiyası üçün 4.2$ və ya 0.17% azalaraq 2359$ olub. Qızılın spot qiyməti isə hal-hazırda 2368$ təşkil edir.
İsrail və Fələstinin “HƏMAS” hərəkatı Qəzza zolağında həll edilməmiş bir çox məsələlərdə razılığa gəliblər. Mənbələrin məlumatına görə, Qəzza zolağı ilə bağlı danışıqlar çərşənbə günü Qətərin paytaxtı Dohada, cümə axşamı isə Qahirədə bərpa olunacaq. Qızıl ənənəvi olaraq “etibarlı liman” maliyyə aktivi rolunu oynayır və qlobal qeyri-müəyyənlik artdıqca ona olan tələb artır.
Londonun “ICE” birjasında “Brent” markalı neftin sentyabr ayı üzrə fyuçerslərinin qiyməti 1.01% ucuzlaşaraq bir barrel üçün 84.89$ təşkil edib. “Brent” markalı neftin spot qiyməti isə 2024-cü il iyulun 1-dən bəri ilk dəfə bir barrel üçün 85$ səviyyəsindən aşağı satılır.
Qeyd olunur ki, ABŞ-ın əsas neft hasilatı mərkəzi olan Texası vuran “Beril” qasırğasının ekspertlərin gözlədiyindən daha az ziyan vurması üzə çıxdıqdan sonra, neft qiymətləri ucuzlaşıb. Bu, ABŞ neftinin təxminən 40%-nin istehsal olunduğu Texasda tədarükün kəsilməsi ilə bağlı narahatlıqları azaldıb.
Məlumat İnvest-Az İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
