Bu həftə Fransada keçiriləcək seçkilərin ikinci turu və Böyük Britaniyada baş tutacaq parlament seçkiləri fonunda hökm sürən qeyri-müəyyənliklər səbəbi ilə avro və funt dollar qarşısında zəifləyirlər. Ötən gün 1.0776 həddinə qədər artım göstərən EURUSD valyuta cütlüyü hal-hazırda 1.0727 səviyyəsində ticarət olunur. Eyni zamanda, USDJPY cütlüyü bugün 161.390 həddindən 161.660 həddinə qədər yüksəlib. Dollar indeksi isə 0.03% artaraq 105.94 bənd təşkil edir.
Dünən ABŞ-da sənaye sektoruna dair göstəricilər proqnozların altında dərc olundu. Belə ki, Sənaye Sektorunda Biznes Aktivliyi İndeksi iyun ayında 48.7 bənddən 48.5 bəndədək enib. Analitiklər, əksinə, göstəricinin 49.2 bəndə qədər artacağını ehtimal edirdilər. Həmçinin ölkənin Sənaye Sektorunda Məşğulluq İndeksi öncəki ay ilə müqayisədə iyunda 51.1 bənddən 49.3 bəndədək, Sənaye Sektorunda Qiymət İndeksi isə 57 bənddən 52.1 bəndədək enib.
Almaniyada İstehlak Qiymətləri İndeksi may ayı ilə müqayisədə iyun ayında illik ifadədə 2.4%-dən 2.2%-ə azalıb. Analitiklər göstəricinin yalnız 2.3% səviyyəsinə qədər dəyişəcəyini proqnozlaşdırmışdılar. Aylıq ifadədə isə Almaniyada istehlak qiymətləri, ilkin məlumatlara görə, 0.1% artıblar. Ekspertlər 0.2%-lik artım proqnoz etmişdilər.
Qızılın qiyməti çərşənbə axşamı səhər ABŞ Federal Ehtiyatlar Sisteminin (FED) rəhbəri Cerom Pavelin çıxışı ərəfəsində bir qədər ucuzlaşıb. Nyu-Yorkun “Comex” birjasında avqust ayı üzrə qızıl fyuçerslərinin qiyməti 1.8$ və ya 0.08% ucuzlaşaraq 1 troya unsiyası üçün 2337.1$ təşkil edib. Qızılın spot qiyməti 2330$-dır.
AMB-nin sədri Kristin Laqard bazar ertəsi günü çıxışında bildirib ki, Avropa Mərkəzi Bankının inflyasiyanın 2%-ə doğru stabil şəkildə yaxınlaşmasına əmin olmaq üçün daha çox vaxt lazımdır və əlverişli iqtisadi nəticələr faiz endirimlərinin o qədər də təcili olmadığını göstərir.
Bugün bazar iştirakçıları Avrozonada illik inflyasiyaya dair məlumatların dərc olunmasını maraqla gözləyirlər. İqtisadçılar hesab edirlər ki, ölkədə inflyasiya, ilkin hesablamalara görə, iyun ayında 2.6%-dən 2.5%-ə qədər enib. Bundan əlavə, “Eurostat” Bakı vaxtı ilə saat 13:00-da işsizlik səviyyəsi göstəricilərini açıqlayacaq. Analitiklər may ayında göstəricinin 6.4% səviyyəsində qaldını ehtimal edirlər.
Həmçinin FED sədri Cerom Pavelin bugünkü çıxışı tənzimləyici qurumun monetar siyasətə dair planları haqqında investorlara əlavə ipucular verə bilər.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
