Beynəlxalq birjalarda dollar major valyutalar qarşısında öz mövqelərini qoruyub saxlayır. Belə ki, EUR/USD valyuta cütlüyü həftənin əvvəlindən eniş tendensiyasını davam etdirib və 1.0932 səviyyəsindən 1.0891 səviyyəsinə qədər ucuzlaşıb. GBP/USD cütlüyündə müvafiq dövr ərzində qiymət üfüqi olaraq dalğalandığının şahidi oluruq. USD/JPY cütlüyü isə demək olar ki, 150.000 həddinə qədər bahalaşıb. Məzənnə son dəfə qeyd olunan səviyyədə avqust ayının əvvəlindən ticarət olunurdu.
Bugün Yaponiyanın Sənaye Sektorunda İstehsal Həcmi göstəricisi dərc olunub. Verilən məlumatlara əsasən, sənaye istehsalı iyul ayı ilə müqayisədə avqust ayında 3.3% azalıb. Dərc olunan rəqəmlər analitiklərin proqnozlarını təkrarlayıb.
“Bitcoin” sentyabr ayının sonundan bu yana ilk dəfə 66500$ səviyyəsini aşıb. ABŞ-ın əsas fond indeksləri isə yüksəlirlər. Belə ki, “S&P 500” indeksi gün ərzində 5872 bəndlik rekord həddə çatıb. İnvestorlar öz növbələrində bir sıra şirkət hesabatları və fond bazarının yüksək qiymətləndirdikləri iqtisadi məlumatları maraqla gözləyirlər.
Həmçinin, bugün Böyük Britaniyada açıqlanacaq əmək bazarına dair statistik rəqəmlər və Avrozonada dərc olunacaq Sənaye Sektorunda İstehsal Həcmi göstəricisi bazar iştirakçılarının diqqət mərkəzində olacaq. Analitiklər Birləşmiş Krallığda işsizliyin 4.1% səviyyəsində qalacağını, Avrozonada sənaye istehsalının isə 1.8% artacağını proqnoz edirlər. Eləcə də, Bakı vaxtı ilə saat 16:30-da Kanadada inflyasiya məlumatları açıqlanacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
