Dünən FED 1-2 noyabr tarixlərində keçirilən Federal Açıq Bazar Komitəsinin (FOMC) iclasının protokollarını dərc edib.
Uçot dərəcəsinin 75 baza bəndi artırılaraq 3.75-4.00% aralığına qaldırıldığı son iclasın protokollarında qarşıdakı iclaslarda faiz artımı tempinin aşağı düşə biləcəyinə dair siqnallar diqqət çəkdi.
Protokollarda bəzi FED rəsmilərinin faiz dərəcələrinin sürətlə artmasından irəli gələn risklərə diqqət çəkdiyi, bəzi üzvlərin isə faiz artımının yavaşlamasının bazarlarda mümkün volatillik ehtimalını azalda biləcəyini qeyd etdiyi bildirilib.
Hazırda birjalar FED-in dekabr toplantısında uçot dərəcələrini 75% ehtimalla 0.50%, 25% ehtimalla isə 0.75% artıracağı proqnozlarını qiymətləndirir. FED-in fevral iclasında isə uçot dərəcələrini 0.50% artıracağı ilə bağlı ehtimallar 50%-in üzərindədir. Bu isə dollar indeksinin yenidən 105 bənd hədlərinə qədər geriləməsinə səbəb oldu. Təhlillərə əsasən dollar indeksindəki geriləmə davam edərsə, EUR/USD və GBP/USD cütlükləri müvafiq olaraq 1.05$ və 1.22$-a kimi bahalaşa bilər.
Son 2 ayda üfüqi tendensiya sərgiləməsi ilə diqqət çəkən USD/TRY cütlüyündə tendensiyanın gələcək taleyinə bu gün keçiriləcək toplantısı zamanı Türkiyə Cümhuriyyəti Mərkəzi Bankının verəcəyi faiz qərarı aydınlıq gətirə bilər. Ehtimal olunduğu kimi uçut dərəcələri 9.00%-ə endirilərsə, bu lirənin ucuzlaşmasına səbəb ola bilər.
Dollar indeksindəki geriləmə fonunda qızıla tələb yenidən artır. Hazırda dünya birjalarında 1754$-dan təklif olunan qiymətli metalın bir unsiya üzrə dəyəri 1750$ həddinin üzərində möhkəmlənə bilsə, 1776$-a kimi bahalaşa bilər.
Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.
