Noyabrın 22-də ləğv prosesində olan "Bank Standard" QSC-nin Kreditorlar Komitəsinin növbəti iclası keçirilib.
Bu barədə Komitənin sədri, hüquqşünas Əkrəm Həsənov məlumat verib.
Onun sözlərinə görə, iclasda Bankın ləğvedicisi olan Azərbaycan Əmanətlərin Sığortalanması Fondunun (ADIF) fəaliyyəti kəskin tənqid olunub, işinin kreditorların, o cümlədən əmanətçilərin maraqlarına zidd olduğu vurğulanıb.
"ADIF-in qeyri-qənaətbəxş fəaliyyəti barədə ölkə rəhbərliyinə şikayətin göndərilməsi barədə qərar qəbul edilib. Fonda qarşı əsas pretenziyalar qısaca bunlardır:
1) Bankın ləğv prosesini plansız və özbaşına aparması, ləğv planını məhkəməyə qanunla nəzərdə tutulmuş müddətdə təqdim etməməsi, məhkəməyə və kreditorlara hörmətsizlik edilməsi;
2) Təqdim edilən ləğv planında çoxsaylı texniki, hüquqi və iqtisadi səhvlərin (səbəb savadsızlıqdır), habelə açıq-aşkar pozuntuların olması;
3) Bankın daşınmaz əmlakının hərraca çıxarılaraq satılmasının ləngidilməsi (konkret alıcılarla pərdəarxası qanunsuz və korrupsion sövdələşmələrin bağlanmasına şübhə var), həmin əmlakların saxlanılması üçün yersiz xərclərin çəkilməsi;
4) Iri borc alanlara qarşı məhkəmə işlərinin aparılmaması (həmin borc alanlarla gizli və korrupsion sövdələşmələrin mövcudluğuna şübhə var), aparılan məhkəmə işlərinin siyahısının gizlədilməsi, bəzi borcların özbaşına silinməsi;
5) Artıq xərclərə yol verilməsi və həmin xərclər üzrə hesabatın verilməməsi;
6) Azərbaycan Mərkəzi Bankının tələbinin növbədənkənar qaydada ödənilməsinin planlaşdırılması;
7) Ləğv prosesinin əvvəllər bəyan edildiyi kimi 2019-cu deyil, 2021-ci ilin sonunda bitirilməsinin planlaşdırılması (Fond rəhbərliyinin qohum-tanışları üçün iş yerlərinin yaradılmasına şübhə var);
"Şikayətin mətni yaxın vaxtda hazırlanıb, razılaşdırılıb göndəriləcək. Onu da deyim ki, ADIF-in rəhbəri Vüqar Abdullayev iclasa dəvət olunsa da, əvvəlki iclaslardan fərqli olaraq son iclasa gəlmədi. Kreditorlar bunu icraçı direktorun müavininin verdiyi vədlərə əməl etməməsi və buna görə də məsuliyyətdən yayınması kimi qiymətləndirib", - deyə Ə.Həsənov qeyd edib.
