FED.az-ın məlumatına görə, bunu iqtisadçı ekspert Qubad İbadoğlu "Facebook" sosial şəbəkəsindəki səhifəsində yazıb.
ELƏCƏ DƏ BAX: Əmanətləri azalıb – RƏSMİ
İqtisadçı qeyd edib ki, ötən il valyuta satışı əvvəlki ildən 80 faiz, idxal isə 32,2 faiz çox olub:
"2018-ci ildə idxal 2013-cü ildən sonra ən yüksək səviyyədə qeydə alınıb.
Azərbaycan Respublikası Dövlət Neft Fondu (ARDNF) tərəfindən 2018-ci ilin dekabr ayı ərzində 677,1 milyon ABŞ dolları məbləğində vəsait satılıb. Beləliklə də bu il ərzində ARDNF tərəfindən satılan valyuta vəsaitinin həcmi 5 milyard 576 milyon dollara çatıb ki, bu da 2017-ci il üzrə cəmi valyuta satışından 80 faiz çoxdur. Hesablamalar göstərir ki, ARDNF bu ilin 7 ayında ötən ildəki qədər valyuta satıb. Bu il ərzində ARDNF-nin orta aylıq satışı 464,6 mln ABŞ dolları olub. Ötən il üzrə orta aylıq valyuta satışı göstəricisi 299,8 milyon ABŞ dolları olub. Göründüyü kimi bu il üzrə orta aylıq valyuta satışı göstəricisi ötən ilkindən 80 faiz çoxdur.
Rəsmi statistikaya görə, bu ilin 11 ayında idxalın həcmi 10295,5 milyon dollar olub ki, bu da ötən ilin eyni dövrü ilə müqayisədə 32,2 faiz çoxdur. Ötən ilki idxal əməliyyatı 2013-cü ildən sonra ən yüksək səviyyədə qeydə alınıb. Beləliklə də, 2018-ci ildə idxalın artması nəticəsində xarici ticarətdə müsbət saldo azalıb. Şübhəsiz ki, ötən ilin dekabr ayında dünya bazarında neft qiymətlərinin ucuzlaşması ixracatı və ilin sonunda idxalın artımı xarici ticarətdə müsbət saldonun daha da azalmasına gətirib çıxaracaq.
Göründüyü kimi ötən il manata təzyiqi artıb və bu ilin start vəziyyəti əvvəlki ildəkindən fərqlidir. Odur ki, bu il xüsusilə də neftin dünya bazar qiymətlərinin ucuzlaşacağı halda manatın sabitliyinə risklər çoxalacaq".
