Ukraynadakı müharibəyə görə Qərbin Rusiyaya tətbiq etdiyi sanksiyaların təsirini Rusiyada bizneslə məşğul olan Azərbaycan sahibkarları da hiss etməyə başlayıblar.
FED.az xəbər verir ki, rublun dollar və avro qarşısında kəskin dəyər itirməsi bu ölkədə kiçik və orta sahibkarlıqla məşğul olan həmyerlilərimizi ciddi narahat edir.
Əsasən meyvə-tərəvəz satışı, mağaza, restoran və hotel biznesi kimi, sahələrdə çalışan həmyerlilərimiz qiymətlərin sürətlə artadığını bildirirlər.
Hazırda həm ərzaq məhsulları, həm də xidmət sahəsində qiymət artımı müşahidə olunur. Bunun isə əhalinin alıcılıq qabiliyyətinin düşməsinə səbəb olacağı şübhə doğurmur.
Azərbaycanlı sahibkar Elşən Şərifov bildirir ki, hələlik yerli malların satışında təsiri yoxdur: «Amma Azərbaycandan gətirilən malların satışı ilə məşğul olan azərbaycanlılara öz təsirini göstərəcək, çünki Azərbaycandan alışımızı dollarla edirik. Ona görə də fərq artıq hiss olunur».
Rusiyada uzunmüddətdir ki, meyvə-tərəvəz biznesi ilə məşğul olan sahibkar Rövşən Mehdiyev bildirir ki, yeni sanksiyalar ticarətə ciddi təsir edib.
Rublun dəyərdən düşməsi, dollar satışının qeyri-rəsmi dayandırılması, eləcə də sanksiyalar nəticəsində beynəlxalq pul köçürmə sistemlərində yaranmış əngəllər də azərbaycanlı sahibkarlara əlavə problemlər yaradıb.
Artıq həmyerlilərimiz Azərbaycana pul köçürməkdə çətinlik çəkməyə başlayıblar.
Rövşən Mehdiyev bildirir ki, Rusiya rublunun dollara nisbətən ucuzlaşması böyük problem yaradır: «Əvvəla dollar tapmaq çətinləşib. Həm də mal ala bilmirik və Azərbaycana pul göndərə bilmirik».
Sahibkar Elman Əzimzadə bildirir ki, Rusiyada yaşayanlar Azərğaycana pul göçürməkdə problemlərlə üzləşir. İndi insanlar onlayn pul köəçürmə proqramlarından istifadə edir. Qərbin bu sistemləri bloklaması nəticəsində artıq pul köçürmələrində çətinliklər yaranıb.
Bununla yanaşı, Rusiyadakı azərbaycanlı sahibkarlar Qərbin sanksiylarının müsbət tərəfi olduğunu bildirirlər. Sahibkarlar deyir k, Rusiya bazarlarında Qərbin sanksiyalarına düşən məhsulların yerini Azərbaycan istehsallı məhsulların alması üçün yaxşı şans yaranıb.
