Kredit reytinq agentliyi “Moody's” ABŞ-ın bir neçə kiçik və orta bankının kredit reytinqini aşağı salması fonunda fond birjalarında yeni bir satış dalğası müşahidə edildi.
“Moody's” 10 ABŞ bankının reytinqini bir pillə aşağı salıb. Əlavə olaraq isə “Bank of New York Mellon”, “US Bancorp”, “State Street” və “Truist Financial” da daxil olmaqla 6 bankın reytinqini mümkün azalmalara görə yoxlamalara başlayıb.
“Fitch”-in keçən həftə ABŞ-ın kredit reytinqini aşağı salmasından sonra “Moody's”-in bəzi banklara verdiyi xəbərdarlığın investorlara ehtiyatlı olmaq üçün əlavə səbəb verdiyini deyən analitiklər, ABŞ-da bank sektorunun sağlamlığı ilə bağlı narahatlıqların da artdığını bildiriblər.
Reytinqin aşağı salınmasından sonra ABŞ-ın ən böyük banklarından olan “Goldman Sachs” və “Bank of America”-nın səhmləri 2%, “JPMorgan Chase”-in səhmləri isə təxminən 1% ucuzlaşıb.
ABŞ Federal Ehtiyatlar Sistemi (FED) rəsmilərinin açıqlamalarına gəldikdə, Filadelfiya FED sədri Patrik Harker, sərt monetar siyasətdə çox uzağa getmək istəmədiklərini, yəqin ki, gələn il faizləri endirməyə başlayacaqlarını bildirib.
Makroiqtisadi məlumatlar tərəfində isə ABŞ-da xarici ticarət kəsiri iyunda aylıq müqayisədə 4.1% azalaraq 65.5 milyard dollara düşüb. Bu dövrdə qlobal tələbin zəifləməsi səbəbiylə ölkənin ixracatı 2022-ci ilin mart ayından bu yana ən aşağı səviyyəyə düşüb. İdxal isə davam edən yüksək inflyasiya və daxili tələbata təsir edən faiz dərəcələrinin artması səbəbindən 2021-ci ilin noyabr ayından bu yana ən aşağı həddə kimi geriləyib.
ABŞ-da topdansatış ehtiyatları iyunda gözləniləndən çox 0.5% azalıb, topdan satış dövriyyəsinin həcmi isə 0.7% geriləyərək 643.3 milyard dollar olub.
Nyu-York FED-in hazırladığı Ev Təsərrüfatlarının Borc və Kredit Hesabatına görə, ölkədə ev təsərrüfatlarının borcu bu ilin ikinci rübündə əvvəlki rüblə müqayisədə 0.1% artaraq 17.06 trilyon dollara çatıb. Kredit kartı borcu isə bu ilin ikinci rübündə 45 milyard dollar artaraq 1.03 trilyon dollar təşkil edib və ilk dəfə olaraq 1 trilyon dolları keçib.
Qeyd edək ki, hazırda 102.50 bənd hədlərində dalğalanan DXY-da “Buğalar” qiyməti bu 103.50 bənd səviyyəsindəki psixoloji müqavimət həddinin üzərinə qaytara bilsələr, dollarda artım tendensiyası daha kəskin xarakter ala bilər. “Ayılar”ın güclü olduğu bir ssenaridə isə 100.00 bənd səviyyəsi olduqca önəmli psixoloji dəstək həddi olaraq aktuallığını qoruyur.
Məlumat InvestAZ İnvestisiya Şirkəti"nin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
