2025-ci ilin yekunlarına görə, "Unibank" maliyyə ilini 25,8 milyon manata yaxın xalis mənfəətlə başa vurub ki, bu da ötən illə müqayisədə 5,4 milyon manat və ya 26,4% artım deməkdir.
FED.az biznes və maliyyə xəbərləri portalı xəbər verir ki, bankın maliyyə hesabatına istinadən xəbər verir.
Bankın yekun mənfəətinin artmasında əsas rolu qeyri-faiz əməliyyatları oynayıb. Qeyri-faiz gəlirləri ötən ilə nəzərən 23,8 milyon manat (19,5%) artaraq 146,3 milyon manata çatıb. Bu artımın fonunda alınan haqq və komissiya gəlirləri 21,9 milyon manat (20,9%) artaraq 126,9 milyon manata yüksəlib.
Xalis faiz gəliri 143,1 milyon manata bərabər olub. Bankın ümumi faiz gəlirləri 251,2 milyon manat, faiz xərcləri isə 101,9 milyon manat təşkil edib.
Bankın əməliyyat xərclərində də artım müşahidə olunub. Qeyri-faiz xərcləri ümumilikdə 11,9 milyon manat (5,7%) artaraq 219,5 milyon manata çatıb. Bu artımın tərkibində əmək haqqı və digər kompensasiya xərcləri 2,3 milyon manat (3,2%), amortizasiya xərcləri 2,5 milyon manat (24,4%), digər xərclər isə 9 milyon manata (11,3%) yaxın artıb.
Bütün bu gəlir və xərclərin nəticəsində bankın əməliyyat mənfəəti 6,3 milyon manat (10,1%) artaraq 69,9 milyon manata yüksəlib. Bank, aktivlər üzrə mümkün zərərlərin ödənilməsi üçün 35,3 milyon manat məqsədli ehtiyat ayırıb ki, bu da ötən ilki göstəricidən cəmi 117 min (0,3%) manat çoxdur.
Vergi ödənişindən əvvəl 34,6 milyon manat mənfəət əldə edən bank, 8,9 milyon manat mənfəət vergisi ödəyib.
Xatırladaq ki, "Unibank" 2024-cü ili 20,4 milyon manat xalis mənfəətlə yekunlaşdırmışdı.
2025-ci ilin yekunlarına görə (31.12.2025 tarixinə), "Unibank"ın cəmi aktivləri 2 milyard 132,9 milyon manat təşkil edib.
Bu, ötən ilin eyni dövrü ilə müqayisədə 373,2 milyon manat, yəni 21,2% artım deməkdir. Bankın aktivlərinin artmasında əsas rolu kredit portfelinin böyüməsi oynayıb.
Bankın müştərilərə verilmiş xalis kreditlərinin həcmi ötən ilə nəzərən 162,5 milyon manat (14,6%) artaraq 1 milyard 276,2 milyon manata çatıb. Portfelin tərkibində istehlak kreditləri 28,7 milyon (4,6%) manat artaraq 647,2 milyon manata, biznes kreditləri isə 117,6 milyon (26,9%) manat artaraq 554,6 milyon manata yüksəlib. İpoteka kreditləri isə 102,8 milyon manat təşkil edib ki, bu da illik müqayisədə 3,8 milyon manat, başqa sözlə (3,8%) artım deməkdir.
Bankın nağd pul vəsaitləri və ekvivalentləri də kəskin artıb. Bu göstərici illik müqayisədə 149,5 milyon manat (63,5%) artaraq 385,4 milyon manat təşkil edib. Eyni zamanda, bankın investisiya qiymətli kağızları 10,3 milyon (17,5%) manat, digər maliyyə institutlarındakı depozitləri isə 14,4 milyon (48,9%) manat artıb.
Xatırladaq ki, 2024-cü ilin sonunda "Unibank"ın cəmi aktivləri 1 milyard 759,7 milyon manat olub.
2025-ci ilin yekunlarına görə "Unibank"ın cəmi öhdəlikləri 1 milyard 940,1 milyon manat təşkil edib.
Bu, ötən ilin eyni dövrü ilə müqayisədə 347,4 milyon manat, yəni 21,8% artım deməkdir. Öhdəliklərin artımında əsas pay depozitlərin və digər maliyyə institutları qarşısındakı öhdəliklərin üzərinə düşür.
Bankın depozit portfeli ötən ilə nəzərən 173,3 milyon manat (14,4%) artaraq 1 milyard 377,9 milyon manata çatıb. Bu artım həm fiziki şəxslərin depozitlərinin (132,6 milyon manat (13,9%) artım), həm də hüquqi şəxslərin depozitlərinin (40,6 milyon manat və 16,4% artım) hesabına baş verib.
Bankın kredit təşkilatları və digər maliyyə institutları qarşısındakı öhdəlikləri isə illik müqayisədə 97,6 milyon manat (46,7%) artaraq 306,6 milyon manata yüksəlib. Eyni zamanda, bankın subordinasiya borc öhdəlikləri də 37,2 milyon manat (77,9%) artaraq 85 milyon manatı ötüb.
Xatırladaq ki, 2024-cü ilin sonunda "Unibank"ın cəmi öhdəlikləri 1 milyard 592,7 milyon manat olub.
2025-ci ilin yekunlarına görə "Unibank"ın cəmi kapitalı 192,8 milyon manat təşkil edib.
