ABŞ-ın əmək bazarına dair göstəricilərin dərc olunmasından sonra beynəlxalq birjalarda dollar major valyutalar qarşısında dəyər itirməyə davam edir, qızıl isə tarixi maksimum səviyyəsini yeniləyib.
Ötən həftə açıqlanan zəif statistik nəticələr investorlarda Federal Ehtiyatlar Sisteminin (FED) sentyabr iclasında uçot dərəcəsini azaldacağına dair inamı gücləndirib. Bəzi ekspertlər hətta faiz dərəcəsinin birdən-birə 50 baza bəndi endirilə biləcəyini istisna etmirlər.
EUR/USD valyuta cütlüyü 1.17030 səviyyəsindən 1.17780 səviyyəsinədək yüksəlib. Eyni müddət ərzində GBP/USD cütlüyü 1.34820 həddindən bahalaşaraq 1.35770 həddinə kimi artıb. USD/JPY cütlüyü isə 148.570 səviyyəsindən 146.900 səviyyəsinədək kəskin enib. Qızıl ötən ayın sonunda başlayan artım tendensiyasını davam etdirir. Qiymətli metalın bir unsiyasının dəyəri bu gün 3658$-a qədər yüksələrək yeni rekord həddi müəyyən edib.
Bazar günü “OPEC+” ölkələrinin nümayəndələrinin keçirilmiş görüşün yekununda iştirakçılar oktyabr ayı üçün neft hasilatının maksimal icazə verilən səviyyəsini sentyabr göstəricisi ilə müqayisədə sutkada 137 min barel artırmaq barədə qərar qəbul ediblər. Bunun fonunda “Brent” markalı neftin bir barel üçün qiyməti ilk olaraq 67.30$-a qədər artıb, daha sonra isə “qara qızıl” 66$-a kimi geriləyib. Hazırda neftin qiyməti 66.70$ ətrafında ticarət olunur.
Bazar ertəsi Almaniyada açıqlanmış məlumatlara əsasən, ölkənin Ticarət Saldosu iyul ayında 15.4 milyard avrodan 14.7 milyard avroya kimi zəifləyib. Almaniyanın Sənaye Sektorunda İstehsal Həcmi isə iyun ayında 0.1% azaldıqdan sonra iyul ayında 1.3% artıb. Həmçinin, Yaponiyanın ÜDM-i rüblük ifadədə 0.5% artıb.
İnvestorlar çərşənbə günü ABŞ-da açıqlanacaq İstehsal Qiymətləri İndeksi (PPI) və cümə axşamı Avropa Mərkəzi Bankının (ECB) faiz dərəcəsi ilə bağlı qərarını diqqətlə izləyəcəklər.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
