Azərbaycanın Rusiyadakı Ticarət Nümayəndəliyi Rusiya regionlarına ərzaq tədarükünün həcm və çeşidinin artırılmasını, xüsusilə də Sverdlovsk vilayətində mağazalar şəbəkəsinin yaradılmasını nəzərdə tutan layihə hazırlayıb.
FED.az xəbər verir ki, "Ural Ticarət və Sənaye Palatasının meydançasında "Azərbaycanın sovqatları" layihəsinin təqdimatı keçirilib. Layihə Sverdlovsk vilayətində Azərbaycan məhsullarının satışının həyata keçirildiyi mağazalar şəbəkəsinin yaradılmasını nəzərdə tutur", - deyə Russian Business Guide (RBG) məlumat verir.
Azərbaycanın Yekaterinburqdakı baş konsulu İlqar İsgəndərov layihənin təqdimatında iştirak edib. O, layihənin həyata keçirilməsində Ural Ticarət və Sənaye Palatasının köməyinə ümidvar olduğunu deyib.
“Nümayəndəliyin baş müşaviri Namiq Xəlilov bildirib ki, Azərbaycan istehsalı olan qənnadı məmulatları, şərab və meyvə-tərəvəz məhsullarının bir çoxu Moskvada və Moskva vilayətində satılır. Çünki Azərbaycanın Ticarət Nümayəndəliyi Rusiyanın paytaxtında fəaliyyət göstərir və ərzaq məhsullarının təşviqi üzrə genişmiqyaslı aksiyalar təşkil edir. Bundan əlavə, Azərbaycan məhsulları Moskvada keçirilən “World Food Moscow” və PRODEXPO sərgilərində geniş təmsil olunub”, - deyə RBG bildirir.
Rusiyanın digər subyektlərində Azərbaycan məhsullarının çeşidi olduqca azdır, bu, həm də məhsulların Rusiya regionlarına çatdırılma sisteminin zəif təşkil olunması ilə əlaqədardır.
“Azərbaycanın sovqatları” layihəsi Rusiya regionlarında məhsul çeşidinin artırılması məqsədilə hazırlanıb.
"Azərbaycanın planlarında Sverdlovsk vilayəti xüsusi yer tutur. Xüsusilə Orta Ural sahibkarları Ural Ticarət və Sənaye Palatasının vasitəçiliyi ilə Bakıda keçirilən biznes forumlarda və Yekaterinburqda təşkil olunan Rusiya-Azərbaycan regionlararası forumlarında iştirak edirlər. İqtisadi-ticarət əlaqələrinin genişləndirilməsi sayəsində Sverdlovsk vilayəti ilə Azərbaycan arasında ticarət dövriyyəsi durmadan artır: 2018-ci ildə bu göstərici 1,8 dəfə artaraq 95 mln. dollar təşkil edib", - deyə nəşr yazır.
