Bu gün V Ümumdünya Mədəniyyətlərarası Dialoq Forumunda "Dayanıqlı inkişaf məqsədləri üçün tərəfdaşlığın qurulması" mövzusunda müzakirələrə başlanılıb.
FED.az xəbər verir ki, mərasimdə çıxış edən BMT-nin Azərbaycandakı Rezident əlaqələndiricisi Qulam İsakzai bildirib ki, son 30 ildə dünyada hərbi xərclər dəfələrlə artıb: "Amma sosial sahəyə azalan xərclər isə azalıb. Dünya üzrə yoxsulların sayı 3 milyarda yaxındır. Onlar günü 2,5 dollara yaşayırlar. Biz bu problemi həll etmək üçün öhdəlik götürməliyik".
Daha sonra çıxış edən YUNESKO Baş direktorunun Sosial və humanitar elmlər üzrə müavini Nada Al-Naşif isə vurğulayıb ki, inklüziv olmayan cəmiyyətlər daha zəif olur: "Ona görə də insanların təfəkküründə ciddi dəyişikliklər yaratmaq vacib məsələdir. Missiyamız dəyişən dünyada inkişafı insanlara aşılamaqdır. BMT bundan sonra da diplomatiya və dialoqu daha gücləndirəcək. Təəssüf ki, bəzi proqramların uğursuz olmasını da eşidirik. Müqavimət və münaqişə şəraitində olan yerlərdə xüsusilə gənc qadınları yeni bacarıqlarla silahlandırmaq lazımdır. Gənclərin sosial dəstəyə ehtiyacı var.
Mədəni müxtəlifliyin zəruri olduğunu insanlara erkən yaşlarda təlqin etməliyik".
