Quba rayonunda ən uğurlu femerlərdən sayılan Bahadur Əhmədov həyata 42 il əvvəl Bəhyə dağının ətəklərində, yaz-yay aylarında gur sulu Qaraçayın sağ sahillərində yerləşən İkinci Nügədi kəndində göz açıb. Onun başçılıq etdiyi fermer təsərrüfatı 20 hektar sahədə çeşidli meyvələr becərib yetişdirməklə məşğuldur. Hər il bu bağlardan bol məhsul toplamağın sirlərini yaxşı bilən Bahadur boy-buxunlu, simasından səmimiyyət və mehribanlıq yağan, deyib-gülməyi sevən, səmimi əmək adamıdır.
Məcnun Məmmədov: "Banklar fermerlər üçün girov tələblərini yumşaltmağa hazırdır"
Bahadur Əhmədov İkinci Nügədi kənd orta məktəbində uzun illər əmək və fiziki təlim fənnindən dərs deyən Adəm müəllimin oğludur. Atası onu və qardaşını hələ uşaq yaşlarından halal əməyə dərin sevgi, hörmət ruhunda tərbiyə verərək böyüdüb. Onun rəhbəri olduğu fermer təsərrüfatındakı sahələrdə göz oxşayan barlı-bərəkətli meyvə, gilas və gavalı bağlarına baxaraq heyran qalmamaq qeyri-mümkündür.
Bahadur həm də səmimi, mehriban həmsöhbətdir. İyun ayının 24-də saat 12 radələrində onunla bağda görüşən anlarda hava çox xoş idi. Əvvəlcə, fermerin təxminən 7-8 il əvvəl saldığı gilas bağlarını gəzdik. Günəşin hərarətini canına hopdurub budaqlardan sallanan iri gilasları görüb sevindim. Fermerin bağlarda builki əməyi də öz bəhrəsini verib. Meyvəçi qızlar isə böyük həvəslə məhsulu toplamaqla məşğul idilər.
Söhbət Qubada keçirilən zona müşavirəsindən düşdü. Bahadur Əhmədov fəxrlə dedi:
– Qubadakı zona müavirəsinin iştirakçısı olmuşam. Sağ olsunlar, toplantının sonunda biz fermerlərə arzu, təkliflərimizi bildirmək üçün şərait yaratdılar. Mən 2 təkliflə çıxış etdim. Birincisi, qeyd etdim ki, bəzən fermerlər sahələrdə zəruri tikinti işləri həyata keçirməli olurlar. Bu zaman həmin obyektlərə elektrik xətləri çəkmək lazım gəlir. Bununla bağlı hazırkı tariflər isə yüksəkdir. Bunun üçün fermerlərə müəyyən güzəştlər edilməlidir.
– Bəs ikinci təklifin nə ilə bağlı idi?
– Qoy hələ birinci təklifimlə bağlı fikrimi başa çatdırım. Təsəvvür edirsiniz, bu günlərdə möhtərəm Prezidentin bu məsələ ilə bağlı sərəncamı çıxıb. Sənəddə qeyd olunur ki, 2027-ci il yanvarın 1-dən bu məsələdə fermerlərə güzəştlər tətbiq ediləcək. Mən möhtərəm dövlət başçısına buna görə son dərəcə minnətdaram. Yaxın vaxtlarda biz öz fermer təsərrüfatımızda ayrıca iri meyvə soyuducu anbar inşa etdirmək istəyirik. Bu sərəncamdan sonra artıq bağlara elektrik xətlərinin çəkilməsi ilə bağlı xərclərimiz xeyli azalacaq.
Bahadur Əhmədov sonra növbəti sualımı gözləmədən ikinci təklifini də dedi:
– Bilirsinizmi, hazırkı qanunvericiliyə görə, sahələrə dolu düşən zaman fermerlərə müəyyən güzəştlər edilir. Bu il şimal zonasında hava çox yağıntılı keçib. Bizdə bağların örtüklənməsinə kəskin ehtiyac var. Müşavirədə xahiş etdim ki, yağışla bağlı da şimal zonasındakı fermerlərə subsidiyalar ayrılsın.
Bahadur Əhmədov ümud edir ki, müvafiq qurumlar bu məsələdə də fermerlərin çətinliklərini nəzərə alacaqlar və problem öz mübət həllini tapacaq.
Fermer bizimlə söhbətin sonunda möhtərəm Prezidentimizin rəhbərliyi ilə aqrar sektorda görülən işləri diqqətlə izlədiyini, ölkəmizin digər sahələrdə olduğu kimi, bu istiqamətdə də ciddi irəliləyişlər əldə edəcəyinə zərrə qədər şübhə etmədiyini əminliklə bildirdi:
– Prezident İlham Əliyev hansı işi irəli çəkirsə, orada uğur, qələbə qazanılıb. Dövlətimizin fermerlərə hərtərəfli və əməli dəstəyi imkanlarımızı daha da genişləndirir.
Bahadur Əhmədovdan hazırda ən böyük arzusunun nə olduğunu soruşdum. Sualım ürəyincə oldu:
– Qazandığımız uğurlarla dövlət başçısını razı salmaqdan böyük nə ola bilər? Mənim və aqrar sektorda çalışan bütün bağban və fermerlərin uğurları, ilk növbədə, dövlətimizin, şəxsən ölkə başçısının müdrik siyasətinin nəticəsində mümkün olub. Bu gün insanlar halal zəhmətlə ailələrini dolandırırlar. Buna görə, möhtərəm Prezidentə dərin minnətdarlığımı bildirmək istəyirəm. (Xalq qəzeti)
