Avropa İttifaqına məhsul ixracına icazə verilmiş Azərbaycan müəssisələrinin sayı son illərdə əhəmiyyətli dərəcədə artıb.

FED.az xəbər verir ki, bu, Prezident İlham Əliyevin 10 sentyabr 2026-cı il tarixli Sərəncamı ilə təsdiq edilmiş “Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı”nda əksini tapıb.

Dövlət Proqramında bildirilir ki, 2018-ci ildə belə müəssisələrin sayı 2 olduğu halda, 2025-ci ildə 12-yə çatıb.

Bundan əlavə, akvakulturada yetişdirilən nərəkimilərdən alınan kürü məhsulunun Avropa İttifaqına ixracı üzrə icazə əldə olunub.

Azərbaycanın adı Aİ-yə heyvan mənşəli məhsullar ixrac etməsinə icazə verilən ölkələrin müvafiq siyahısına daxil edilib.

Azərbaycan fındığı Avropa İttifaqında “yaşıl dəhliz”dən keçir

Azərbaycan fındığının Avropa İttifaqına ixracında tətbiq edilən yoxlama şərtləri əhəmiyyətli dərəcədə yumşaldılıb.

Dövlət Proqramında qeyd olunur ki, Azərbaycandan Aİ-yə ixrac olunan fındıq məhsullarında aşkarlanan uyğunsuzluqlarla bağlı bildirişlərin sayı xeyli azalıb.

Bunun nəticəsində 2021-ci ildən Azərbaycan fındığına Avropa İttifaqı tərəfindən “yaşıl dəhliz” tətbiq edilir.

Məhsulların müayinə tezliyi 20 faizə endirilib, ixrac üçün sertifikat tələbi isə aradan qaldırılıb.