Azərbaycanın aparıcı kredit təşkilatlarından olan «Para» BOKT 2021-ci il üzrə hesabatını və auditor rəyini açıqlayıb.
Eləcə də bax: Azərbaycanda 30 saniyəyə kredit verən şirkətin vəziyyəti - MƏLUM OLDU
FED.az xəbər verir ki, hesabata əsasən «Para» BOKT artıq 2-ci ildir ki, ili zərərlə başa vurur, bundan başqa şirkətin kredit portfelində yaranan problemlərə görə, təşkilatın kapitalı mənfiyə düşüb.
Hesabatda deyilir ki, 2021-ci ildə «Para» BOKT-un faiz gəlirləri 7 312 min manat, faiz xərcləri isə 1 369 min manat olub. Təşkilat ili 5 943 min manat xalis faiz gəliri ilə başa vurub.
2020-ci illə müqayisədə faiz gəlirlərinin təqribən 200 min manat artması, faiz xərclərinin isə 1 milyon manat azalması nəticəsində 2021-ci ildə təşkilatın xalis faiz gəliri 2020-ci illə müqayisədə 1,2 milyon manat artıq olub.
Digər gəlirləri və xərcləri də nəzərə alanda şirkətin əməliyyat gəliri 6,3 milyon manata çatır, bu da 2020-ci ildə müqayisədə təqribən 1,5 milyon manat artıqdır.
«Para» BOKT-un əsas başağrısı dəyərdən düşən kreditlərlə bağlıdır, 2020-ci ildə 14 milyon aktivin dəyərsizləşməsindən sonra 2021-ci ildə daha 10,3 milyon manatlıq aktiv dəyərini itirib.
2021-ci ildə «Para» BOKT işçi heyətinə 393 min manat, inzibati xərclərə isə 971 min manat xərcləyib.
Qeyd edək ki, 2020-ci illə müqayisədə əmək haqları 2,4 dəfə azalaraq 934 min manatdan 393 min manata, inzibati xərclər isə 30% azalaraq 1,4 milyon manatdan 971 min manat enib. Bu göstəricilər şirkətdə işçilərin ixtisarı və əmək haqlarını azalmasını göstərir.
Nəticədə «Para» BOKT 2021-ci ili 5 milyon 414 min manat xalis zərərlə başa vurub. Bununla yanaşı, qeyd edək ki, bu – 2020-ci ildəki göstəricidən nisbətən yaxşıdır, 2020-ci ildə şirkətin xalis zərəri 11,7 milyon manat olmuşdu.
Şirkətin son iki ildə etdiyi təqribən 17 milyon manatlıq zərər onun digər göstəricilərini də pisləşdirib.
2021-ci ilin nəticələrinə görə «Para» BOKT-un aktivləri 12 milyon manat azalaraq 45 milyon manatdan 33 milyon manata düşüb.
Azalma demək olar ki, tamamilə kredit portfelindəki kiçilmə ilə bağlıdır. Kredit portfeli 34 milyon manatdan 23 milyon manata enib.
BOKT-un öhdəlikləri də azalaraq 54,8 milyon manatdan 48,2 milyon manata enib. Yeri gəlmişkən, ilin sonuna «Para» BOKT-un banklar qarşısında 34,5 milyon manat kredit öhdəliyi var.
Başqa sözlə, şirkətin öhdəlikləri (48 milyon manat) aktivlərini (33 milyon manat) təqribən 15 milyon manat üstələyib və «Para» BOKT-da kapital 15 milyon manat mənfiyə düşüb.
Başqa sözlə, son iki ilin zərərləri kapitalı «yeyib». Fəaliyyətini davam etdirmək üçün «Para» BOKT-a yatırım tələb olunacaq.
Şirkətin illik hesabatını hazırlayan «Prime» şirkətinin auditorları da «Para» BOKT-un vəziyyətinin mürəkkəb olduğunu, burada «Əhəmiyyətli dərəcədə qeyri-müəyyənliyin olduğunu» bildirirlər.
Hesabatda deyilir ki, «Para» BOKT 31 dekabr 2021-ci il tarixində tamamlanan il üzrə 5,414 min AZN zərərə uğramışdır. Həmin tarixə Təşkilatın öhdəlikləri aktivlərindən 15,069 min AZN çox olub, Bununla yanaşı maliyyə aktivləri və öhdəliklərinin müqavilə üzrə ödəniş tarixlərinə əsasən, Təşkilatın 31 dekabr 2021-ci il tarixinindən sonrakı on iki aylıq dövrdə 15,757 min AZN məcmu likvidlik çatışmazlığı ilə üzləşməsi gözlənilir.
Qeyd edək ki, «Para» BOKT-un adi səhmlərinin 95%-i Vəli Quliyev və onun ailə üzvlərinə məxsudur. Rasim Poladov və digər səhmdarların payı uyğun olaraq 4% və 1% təşkil edir.
«Para» BOKT-un imtiyazlı səhmlərinə isə Səfərov Əşrəf, Səfərov Faiq, Səfərov İbrahim, Səfərli Əvəz, quliyev Eldar və onun ailə üzvləri nəzarət edir – 97,6%. Digər 2,4% imtiyazlı səhmlərin pay bölgüsü fərdi sahibkarlar arasında bölüşdürülür.
