Avtomobil almaq üçün kredit götürmək və ya aldığımız avtomobili kreditə salmaq üçün banklarla yanaşı, bank olmayan kredit təşkilatları – BOKT-lar da müxtəlif təkliflər irəli sürür.

Avtomobil krediti götürmək istəyənlərin böyük hissəsi məhz BOKT-lara üz tuturlar. Bu da, BOKT-ların rəqabətli mühitdə işləməsinə, faiz dərəcləri ilə bağlı bir-birləri ilə rəqabətdə olmasına gətirib çıxarır.

FED.az biznes və maliyyə xəbərləri portalı bu dəfə BOKT-ların avtomobil almaq üçün krediti hansı şərtlərlə verdiklərini araşdırıb.

Araşdırma zamanı məlum olub ki, avtomobil almaqdan ötrü BOKT-lardan 200 min manata qədər kredit götürmək olar. Kreditin müddəti BOKT-lardan asılı olaraq 3-60 ay ərzində, illik faiz dərəcəsi isə 18-45% faiz dərəcəsi arasında dəyişir.

Bundan başqa, BOKT-larda kredit komissiyaları da kifayət qədər yüksəkdir. Bəzi BOKT-lar kredit faizində etdikləri endirimin əvəzini komissiyadan çıxırlar. Nəticədə komissiya xərcləri 6-8%-ə qədər yüksəlir. Yeri gəlmişkən, bəzi BOKT-lar komissiyanın real həddini gizlətməyə üstünlük verirlər.

Ölkədə ən sərfəli avtokredit verən BOKT-lardan biri “FinTrend” BOKT-dur. Bu kredit təşkilatının illik faiz dərəcələri 18%-dən başlayır, amma burada kreditin məbləği digər BOKT-lara nəzərən daha aşağıdır – 50 min manat. Amma bu BOKT komissiya həcmini tam açıqlamır.

“Falcon Finance” BOKT-da da illik faiz dərəcəsi 18-36% arasında dəyişir. Burada 50 min manata qədər krediti 60 aya qədər müddətdə götürmək olar. Hərçənd burada komissiya haqqı 2-8% arasında dəyişir.

“Merkuri” BOKT və “Nas Project” BOKT-da isə avtokreditlər nisbətən daha bahadır. Belə ki, “Merkuri” BOKT-da 30 min manata qədər krediti 36 aya qədər və 28-45% illik faiz dərəcəsi ilə almaq mümkündür. “Nas Project” BOKT-da isə 100 min manata qədər krediti 27-36% illik faiz dərəcəsi ilə almaq mümkündür.

Bu kredit təşkilatında kreditin müddəti fərdi yanaşma əsasında müəyyənləşir.

Komissiya hissəsində - ilə işarələnmiş BOKT-ların rəsmi səhifələrində kredit komissiyası barədə məlumat verilməyib.