"Azərbaycan Dəmir Yolları"nın 2023-cü ildə 653 milyon 498 min manat cəmi gəlirlərinə qarşı cəmi xərcləri 754 milyon 461 min manat təşkil edib.
ADY: Astara terminalının inşası yükaşırmanı 4 milyon tona çatdıracaq
FED.az xəbər verir ki, QSC-nin 31 dekabr 2023-cü il tarixində tamamlanan il üzrə konsolidə edilmiş maliyyə hesabatlarına görə, 31 dekabr 2023-cü il tarixində "Azərbaycan Dəmir Yolları" 5 milyard 966 milyon 950 min manat cəmi aktivlərə malik olub. 2022-ci ilin sonu ilə müqayisədə 2023-cü ildə "Azərbaycan Dəmir Yolları"nın cəmi aktivləri 878 milyon 755 min manat və ya 17,3% artıb. Cəmi aktivlərdəki artım əsasən "Əmlak, tikili və avadanlıqlar", "Pul vəsaitləri və onların ekvivalentləri" və "İnvestisiya qiymətli kağızları" üzrə artımlardan qaynaqlanıb. Ötən il QSC qiymətli kağızlara 58 milyon 92 min manat investisiya edib.
"Azərbaycan Dəmir Yolları"nın cəmi kapitalı dövlətin investisiyaları hesabına 753 milyon 450 min manat artaraq 3 milyard 387 milyon 419 min manata yüksəlib.
CƏMİ GƏLİRLƏRİ ARTIB
"Azərbaycan Dəmir Yolları" QSC-nin əsas fəaliyyətlərdən cəmi gəlirləri 2022-ci illə müqayisədə 2023-cü ildə 1 milyon 264 min manat artaraq 602 milyon 672 min manat təşkil edib. Həmçinin ötən il QSC 50 milyon 826 min manat maliyyə gəlirləri də əldə edib (2022-ci ildə 24 milyon 113 min manat).
"Azərbaycan Dəmir Yolları"nın 2023-cü ildə 653 milyon 498 min manat cəmi gəlirlərinə qarşı cəmi xərcləri 754 milyon 461 min manat təşkil edib. Yaranmış 100 milyon 963 min manatlıq fərq şirkətin böyük məbləğdə kapitalı hesabına bağlanılıb. Ötən il ADY-nin cəmi xərclərinin artması əsasən əməkhaqqı, enerji, material, köhnəlmə və amortizasiya, debitor borcların dəyərsizləşməsi və sair xərclərdəki artımlardan qaynaqlanır.
“Azərbaycan Dəmir Yolları” Qapalı Səhmdar Cəmiyyəti sərnişinlərin və yüklərin dəmir yolları ilə daşınmasını təmin edən dövlət şirkətidir. Cəmiyyətin bütün səhmləri dövlətə məxsusdur. (Marja)
