Azərbaycandan Polşa, Belçika və İsrailə yumurta ixracı ilə bağlı qarşı tərəflərlə danışıqlar aparılır. Yaxın gələcəkdə Azərbaycandan bu ölkələrə də yumurta ixrac olunacaq.
"ABŞ iş adamları bizə müraciət edib yumurtaların keyfiyyəti ilə maraqlandılar" - Azərbaycandan Amerikaya yumurta satışı başlandı
FED.az xəbər verir ki, bu sözləri “Azərbaycan Quş əti, Yumurta İstehsalçıları və İxracatçıları Assosiasiyası” İctimai Birliyinin sədri Mürvət Həsənli deyib.
O bildirib ki, Azərbaycanda kifayət qədər artıq yumurta istehsal olunur və hazırda ölkə əhalisinin yumurtaya tələbatı gündəlik 4 milyon ədəd civarındadır:
“Gündəlik yumurta istehsalımız isə 6 milyon ədədə yaxınlaşır. Ona görə də yumurtalarımız Yaxın Şərq ölkələrinə, Amerika Birləşmiş Ştatlarına (ABŞ) ixrac olunur. Artıq ilk 10 konteyner yumurta Novruz bayramından öncə ABŞ-yə yola salındı. Ümumilikdə, sözügedən ölkəyə 25 konteyner yumurta ixrac etmişik.
Hazırda Polşa ilə danışıqlar aparılır. Həmçinin, Avropa ölkələrindən Belçikaya da yumurta ixracı ilə bağlı sənədləşmə işləri həyata keçirilir. Eyni zamanda, İsraillə də yumurta ixracı ilə bağlı sənədləşmə işləri aparırıq. Yəqin ki, yaxın gələcəkdə biz bu ölkələrə də yumurta ixrac edəcəyik”.
M.Həsənli damazlıq yumurta ixracından da danışıb:
“Damazlıq yumurta ixracımız davam edir. İlin əvvəlindən bugünədək 9 milyon ədədə yaxın damazlıq yumurta ixrac etmişik. Qarşıdakı dövrlərdə ixracımızın daha da artacağını proqnozlaşdırırıq”.
Mütəxəssis onu da qeyd edib ki, Azərbaycanın quş qripindən azad zona kimi qəbul olunması ölkə bazarının Avropa və digər dünya ölkələri üçün açılmasında əsas rol oynayıb:
“May ayına qədər biz artıq toyuq əti ixracına başlayacağıq. Gələcəkdə bu ixracı daha da artıra bilərik”.
M.Həsənli daxili bazarda yumurta və toyuq əti qiymətləri ilə bağlı isə bunları qeyd edib:
“Hazırda daxili bazarda topdansatış süfrə yumurtasının qiyməti 11-12 qəpik arasında dəyişir. Bir kiloqram toyuq ətinin qiyməti isə 3,80-4,20 manat arasında dəyişir. Regionda ən ucuz yumurta və toyuq əti bizdədir. Süfrə yumurtasının ən ucuz satışı ilə bağlı dünyada ilk üçlükdə ola bilərik”.
Qeyd edək ki, Dövlət Statistika Komitəsinin məlumatına görə, ölkədə 2025-ci ilin yanvar-fevral aylarında diri çəkidə 91,2 min ton ət, 322,7 min ton süd, 374,5 milyon ədəd yumurta və 47,7 min ton tərəvəz istehsal olunub. 2024-cü ilin yanvar-fevral ayları ilə müqayisədə tərəvəz istehsalı 16,2 faiz, ət istehsalı 2,4 faiz, yumurta istehsalı 1,8 faiz artıb, süd istehsalı isə 0,5 faiz azalıb. (Trend)
