“NEO BOKT” ASC bank olmayan kredit təşkilatının səhmdarı Rəşad Səlimov şirkətin 108 ədəd səhmini 400,7 min manata alıb. Əqddən sonra onun təşkilatın nizamnamə kapitalındakı payı 40% təşkil edib.
FED.az xəbər verir ki, alış sentyabrın 25-də Bakı Fond Birjasında həyata keçirilib. Hər səhm üzrə qiymət 3 710 manat olub.
Emissiyadan əvvəl yayımlanan məlumatlara görə, şirkətin səhmlərinin 60%-i Elson Aydınova, 40%-i isə Rəşad Səlimova məxsus olub. Səlimovun yeni buraxılışdakı 270 səhmin 108-ni, yəni 40%-ni alması onun kapital artımında əvvəlki payına uyğun iştirak etdiyini göstərir.
Şirkətin ümumilikdə 1 milyon manatlıq əlavə səhm buraxılışının yerləşdirilməsi sentyabrın 25-də yekunlaşıb. Hər birinin nominal dəyəri 3 710 manat olan 270 səhm tam satılıb, yerləşdirmədə iki investor iştirak edib. Anderrayter “Troni İnvestisiya Şirkəti” QSC olub.
Kapital cəlbi şirkətin zərərlə başa vurduğu maliyyə ilindən sonraya təsadüf edir. “NEO BOKT” 2025-ci ildə 80,1 min manat zərər açıqlayıb, 2024-cü ildə isə 222 manat mənfəət əldə etmişdi. Faiz gəlirləri illik 14,6% azalaraq 26,2 min manata, ümumi və inzibati xərclər 7,5% artaraq 124,9 min manata çatıb. Aktivlər 77% azalaraq 30,6 min manat olub.
“NEO BOKT” 2007-ci ildən fəaliyyət göstərən “Finans İnvest” BOKT-un bazasında 2026-cı ildə ad və təşkilati-hüquqi forma dəyişikliyi nəticəsində formalaşıb. Yenidən təşkilatlanma çərçivəsində şirkətin idarəetmə heyəti yenilənib: Anar Məmmədov direktor, Rəşad Səlimov isə Müşahidə Şurasının sədri təyin edilib. BOKT-un hüquqi ünvanı Bakı şəhəri, Nərimanov rayonu, Ə.Rəcəbli küçəsi 3, ev 4 ünvanına dəyişdirilib. (banker)
