Azərbaycan Suriyaya təbii qaz tədarükünə başlamaqla strateji addım atıb və bu, regionda qüvvələr balansını dəyişə və ölkənin Yaxın Şərqdə təsirini gücləndirə bilər.
FED.az xəbər verir ki, bu barədə enerji sahəsində ekspert və Corc Meyson Universitetinin (ABŞ) baş elmi əməkdaşı doktor Umud Şükri “Attaqa” nəşri üçün yazdığı məqaləsində bildirib.
"Azərbaycan qazının Suriyaya tədarükü geosiyasi təsir və iqtisadi maraqları birləşdirən mükəmməl regional strategiyanın bir hissəsidir. Azərbaycan öz enerji diplomatiyasını Avropa və Xəzər regionu hüdudlarından kənara genişləndirməklə Türkiyə vasitəsilə Yaxın Şərq bazarına çıxır", - o qeyd edib.
Ekspertin sözlərinə görə, layihə Bakıya Suriyanın yeni hökuməti ilə əlaqə qurmağa və eyni zamanda Ankara ilə əlaqələri gücləndirməyə imkan verir. Bundan əlavə, əsas enerji infrastrukturundan istifadə Azərbaycanı güc tətbiq etmədən regional dinamikaya təsir göstərən "yumşaq güc" oyunçusuna çevirir.
"Ölkənin bərpasında iştirak xüsusilə ən çox zərər çəkmiş şimal bölgələrində Azərbaycanın müsbət regional oyunçu kimi imicini gücləndirir. Bakı və onun müttəfiqləri yeni hökuməti dəstəkləməklə və Suriyanın bərpasına kömək etməklə öz təsirini genişləndirir", - U. Şükri vurğulayıb.
O qeyd edib ki, Qətərin maliyyə dəstəyi ilə üçtərəfli tərəfdaşlıq regional tendensiyaları dəyişə və Suriyanın bərpa prosesini dəstəkləyə biləcək alyans formalaşdırır.
"Layihə Suriyanın iqtisadiyyatı və enerji sektorunun bərpası ilə yanaşı, regional sabitliyə töhfə verir, diplomatik həll və zorakılığın azaldılması perspektivlərini yaxşılaşdırır. Bu enerji əməkdaşlığı ticarət və infrastruktur vasitəsilə Yaxın Şərqdə sülh quruculuğu üçün təməl və analoji təşəbbüslərdə model ola bilər", - ekspert hesab edir.
U. Şükri əlavə edib ki, bütövlükdə, layihə regional inteqrasiyanın yeni mərhələsinin əsasını qoyur və burada enerji diplomatiyası münaqişələrin həllində, siyasi təsirin gücləndirilməsində və iqtisadiyyatın bərpasında həlledici rol oynayır (Report).
