Azərbaycan 2023-cü ilin yanvar-noyabr aylarında 72 min 644,2 ton “Premium Euro-95” markalı avtomobil benzini idxal edib ki, bu da 2022-ci ilin müvafiq dövrünün göstəricisindən 24,8% azdır.
Azərbaycanda benzin və dizel yanacağı satışından gəlirlər - 8 FAİZ ARTIB
FED.az xəbər verir ki, bu barədə Dövlət Statistika Komitəsindən məlumat verilib.
İdxal olunmuş “Premium Euro-95” markalı benzinin dəyəri $69 milyon 532,89 min (azalma 30%) təşkil edib.
Bu hesabla Azərbaycana idxal olunan “Premium Euro-95” markalı benzinin 1 litrinin idxal qiyməti 72 sent və ya 1,22 manat təşkil edir.
İdxalın əsas həcmi - $35 milyon 596,74 min dəyərində (azalma 51,2%) 38 min 153,14 ton (azalma 45,6%) Rusiyanın payına düşüb.
Bundan başqa, hesabat dövründə Belarusdan 21 min 567,2 ton ($20 milyon 406,06 min dəyərində), Rumıniyadan 7 min 257,59 ton ($7 milyon 510,59 min dəyərində), Yunanıstandan 2 min 861,95 ton ($3 milyon 119,52 min dəyərində), Gürcüstandan 2 min 219,71 ton ($2 milyon 415,29 min dəyərində), BƏƏ-dən 384,6 ton ($282,68 min dəyərində), Bolqarıstandan 200,01 ton benzin ($202,01 min dəyərində) idxal edilib.
2023-cü ilin yanvar-noyabr aylarında Azərbaycana $2 milyon 252,95 min dəyərində (artım 9,8%) 1 min 869,27 ton “Super Euro-98” markalı benzin (artım 11,9%) idxal edilib.
Hesabat dövründə Rumıniyadan 814,1 ton ($995,19 min dəyərində), Rusiyadan 357,1 ton ($402,56 min dəyərində), Belarusdan 593,8 ton ($725,68 min dəyərində), Gürcüstandan 104,24 ton ($127,8 min dəyərində), ABŞ-dan 0,04 ton benzin ($1,72 min dəyərində) idxal edilib.
Azərbaycan 2022-ci ildə $102 milyon 540,18 min dəyərində (azalma 7,7%) 99 min 490,98 ton “Premium Euro-95” markalı avtomobil benzini (azalma 32,5%) idxal edib. İdxalın 73,4%-i Rusiyanın payına düşüb.
2022-ci ildə Azərbaycana $2 milyon 52,49 min dəyərində (azalma 14,3%) 1 min 670,95 ton (azalma 37,8%) “Super Euro-98” markalı avtomobil benzini idxal edilib.
“Premium Euro-95” və “Super Euro-98” markalı benzin növlərinin Azərbaycana idxalına 2014-cü il aprelin 1-dən başlanılıb.
Hazırda daxili bazarda “Premium Euro-95” markalı benzinin 1 litri 2 manat, “Super Euro-98” markalı benzinin 1 litri isə 2,3 manat təşkil edir. (İnterfaks-Azərbaycan)
