Cari ilin mart ayında mikro, kiçik və orta sahibkarlıq subyektlərinin təhsil, elm, tədqiqat və dəstək sahələri üzrə layihələrinin maliyyələşdirilməsi üçün Kiçik və Orta Biznesin İnkişafı Agentliyi (KOBİA) tərəfindən elan edilmiş 3-cü qrant müsabiqəsi üzrə qalib layihələrin maliyyələşdirilməsinə başlanılıb.
FED.az xəbər verir ki, “Kuleko” MMC-nin layihəsi olan “Kuleko - yeni tipli külək enerjisi turbinlərin yaradılması” qalib gələn 13 layihənin sırasında yer almışdır.
“Kuleko” MMC-dən bildirilir ki, yeni külək qurğusu ənənəvi külək generatorlarından üfiqi oxlu olması və xüsusi stasionar panellərə (patent də bu panellərə alınıb) malik olduğu ilə fərqlənir. Belə ki, klassik şaquli oxlu külək generatorları “ventelyatora” oxşayan qurğulardan ibarətdir və küləyin istiqamətindən asılı olaraq yerində fırlanmalı, yəni "küləyi tapmalıdırlar". Nəticədə belə generatorlar küləyi tapmaq üçün əlavə fırlanma mexanizminə malk olmalıdırlar.
Yeni qurğu isə tamamilə fərqlidir və üfiqi şəkildə – yerə paralel yerləşdirilir. Belə olduğuna görə, küləyin istənilən istiqamətində fırlanır və çox yer tutmur. Nəticədə, bir yerdə çoxsaylı belə qurğu yerləşdirmək olur.
Generatorun ölçüləri, tətbiq ediləcəyi yerindən asılı olaraq dəyişir. Hal-hazırda 2,5x2,5 metr minimal işlək modeli üzərində işlər gedir.
"Kuleko"nun iki modifikasiyası var – akkumlytorla (off-grid) və akkumlyatorsuz (on-grid). Akkumlyatorlu variantın üstünlüyü ondadır ki, qurğu işləyən zaman əldə edilən enerji akkumulyatora toplanır, nəticədə külək olmayanda da yığılan enerjini istifadə etmək olur.
Azərbaycanda külək potensialı böyük (245 gün küləkli olur) olduğunu nəzərə alaraq bu layihənin həyata keçirilməsi məqsədə uyğun hesab olunur.
