Azərbaycanda turizmə investisiyalar üçün yeni dəstək mexanizmləri yaradılır
“Turist cəmi 30 dollar ödəyir, qalan 15 min dolları biz ödəyirik”: Səyahət sığortası necə işləyir? - MÜSAHİBƏ
"Azərbaycanda turizmə investisiyalar üçün yeni dəstək mexanizmləri yaradılır. Bu çərçivədə xüsusilə yeni qəbul edilmiş “2026–2030-cu illər üçün Turizmin İnkişafı üzrə Dövlət Proqramı”nı vurğulamaq istərdim. Bu proqram turizm siyasətində yeni mərhələni təmsil edir".
FED.az biznes və maliyyə xəbərləri portalı xəbər verir ki, bu sözləri Dövlət Turizm Agentliyinin sədri Fuad Nağıyev Bakıda keçirilən İkinci Azərbaycan Beynəlxalq İnvestisiya Forumunda deyib.
Sədrin sözlərinə görə, proqramın əsas prioritetlərindən biri daha cəlbedici və rəqabətqabiliyyətli investisiya mühitinin yaradılmasıdır.
Fuad Nağıyev qeyd edib ki, Azərbaycanda otel və digər yerləşdirmə vasitələri, sağlamlıq və kurort müəssisələri, qış idman növləri, eləcə də MICE (işgüzar) və biznes turizmini dəstəkləyən konqres obyektləri üzrə investisiya layihələri üçün kredit təşkilatlarından manatla alınan kreditlərin faiz dərəcələrinin subsidiyalaşdırılması ilə bağlı yeni mexanizm yaradılıb:
"Bununla yanaşı, proqram növbəti dörd il üçün daha geniş və çevik dəstək çərçivəsi müəyyən edir. Buraya yerləşdirmə infrastrukturu üzrə investisiyalar üçün potensial subsidiyalar, əlavə müntəzəm və çarter aviareyslərinin dəstəklənməsi, beynəlxalq turistlərin cəlb edilməsi üçün subsidiyalar, turizmlə bağlı tədbirlərə dəstək, həmçinin mikro və kiçik turizm bizneslərinin dəstəklənməsi daxildir.
İnvestorlar üçün bu, yalnız investisiya imkanlarının yaradılması deyil, həmin imkanlar ətrafında daha əhatəli ekosistemin formalaşdırılması deməkdir".
"Digər mühüm istiqamət turizm və istirahət zonalarının inkişafıdır. Bu zonalar infrastrukturu, turizm xidmətlərini və destinasiyanın inkişafını bir araya gətirərək davamlı turizm inkişafı və investisiyalar üçün şərait yaratmaq məqsədilə layihələndirilib.
Azərbaycan lüks, mədəni və təcrübə turizmi ilə yanaşı, beynəlxalq otel brendləri və kurort layihələri üçün də böyük potensiala malikdir. Ölkənin müxtəlif regionları, zəngin mədəni irsi və unikal turizm aktivləri beynəlxalq ziyarətçilər üçün fərqli və yüksək dəyərli təcrübələrin inkişaf etdirilməsi üçün güclü zəmin yaradır.
Dövlət Turizm Agentliyi investorlar, tərtibatçılar və turizm sənayesinin digər tərəfdaşları ilə sıx əməkdaşlığa sadiqdir.
Məqsəd Azərbaycanı təkcə turistlərin səfər etdiyi ölkəyə deyil, həm də investorların uzunmüddətli potensial gördüyü investisiya məkanına çevirməkdir.
Beynəlxalq investorları, inkişaf tərəfdaşlarını və özəl sektoru Azərbaycana yalnız turizm məkanı kimi deyil, həm də uzunmüddətli investisiya məkanı kimi baxmağa dəvət edirik", - deyə agentlik sədri əlavə edib.
