1 500-dən çox gənci bir araya gətirən regional “INNOSTART” layihəsinin yekun tədbirində 12 yeni startap texnoloji həllərini nümayiş etdirib.
“INNOSTART” İnnovasiya və Rəqəmsal İnkişaf Agentliyinin dəstəyi və “SUP.VC” şirkətinin təşkilatçılığı ilə reallaşdırılıb.
FED.az xəbər verir ki, agentliyin yaydığı məlumatda bildirilir ki, 2023-cü ilin may ayında başlayan “INNOSTART” çərçivəsində ölkənin 6 regionunda ümumilikdə 33 tədbir olmaqla innovativ sahibkarlıq və mentorluq üzrə silsilə təlimlər, habelə startap inkubasiya proqramı keçirilib.
Layihənin yekun “Demo Day” tədbiri 19 fevral tarixində baş tutub. Proqramın məzunları və regional universitetlərin nümayəndələrinin də iştirak etdiyi tədbiri giriş sözü ilə açan İRİA-nın sədri İnarə Vəliyeva təlimlərin region gənclərinin innovativ potensialının üzə çıxarılması baxımından müstəsna əhəmiyyətini vurğulayıb. “Bu layihə Azərbaycanın bölgələrində yaşayan hər bir gəncə innovativ ideyasını reallığa çevirmək üçün böyük imkanlar yaradır və startap quruculuğu üzrə resursları əlçatan edir”, - deyə Agentliyin sədri bildirib.
Çıxışı zamanı “SUP.VC” innovasiya şirkətinin icraçı direktoru Rəşad Eyvazov qeyd edib ki, “INNOSTART” layihəsi hər bir regionun unikal ehtiyaclarını qarşılayacaq innovativ sahibkarlıq fürsətləri yaradır. Bundan əlavə, bu layihə sayəsində startap təsisçiləri öz komandalarına çatışmayan komanda üzvlərini cəlb edə biliblər.
Daha sonra layihədə iştirak etmiş region startapları çoxistiqamətli texnoloji həlləri nümayiş etdirən təqdimatlarla çıxış ediblər. Layihələr xidmət sektoru (məşğulluq, yemək çatdırılması, avtomobil icarəsi və s.), elektron ticarət, aqrobiznes həlləri və təhsil texnologiyası kimi sahələri əhatə edir.
Təlimlər silsiləsindən ibarət proqram Şəki, Zaqatala, Mingəçevir, Gəncə, Sumqayıt və Lənkəranda keçirilib. “INNOSTART”ın mentorluq istiqaməti isə regionlarda innovasiya yönümlü layihələr üçün 18 yeni mentor yetişdirib.
Qeyd edək ki, “INNOSTART” layihəsinin əsas məqsədi ölkəmizin bölgələrində startap quruculuğu üzrə maariflənməni gücləndirməkdir. Təlimlərdə startap komandaları ideyanın biznesə çevrilməsi və inkişaf etdirilməsi, innovativ fəaliyyətin ölkə iqtisadiyyatına verdiyi faydalar haqqında aktual biliklər əldə ediblər. Bununla yanaşı, təlimlərin iştirakçıları startap quruculuğunun müxtəlif aspektlərini və ən qabaqcıl beynəlxalq təcrübəni özündə birləşdirən praktiki tapşırıqları yerinə yetirməklə mühüm bacarıqlara yiyələniblər.
