Azərbaycanda milli valyutada cəlb olunmuş əmanətlərin həcmi üzrə regionların reytinqi açıqlanıb.
FED.az Azərbaycan Mərkəzi Bankına istinadən xəbər verir ki, respublika üzrə təxminən 10,5 milyard manatlıq ümumi portfelin böyük əksəriyyəti paytaxt və ona yaxın ərazilərdə cəmləşib.
Reytinqdə mütləq lider olan Bakı iqtisadi rayonunda cəlb olunmuş əmanətlərin həcmi 8 milyard 826 milyon 169 min manat təşkil edib. Maraqlıdır ki, ən böyük həcmə malik olmasına baxmayaraq, paytaxtda təklif olunan orta faiz dərəcəsi 6,48% ilə respublika ortalamasından bir qədər aşağıdır.
Paytaxtdan sonra ikinci yerdə Abşeron-Xızı iqtisadi rayonu qərarlaşıb. Bu regionda əmanətlərin ümumi həcmi 477 milyon 333 min manat, orta faiz dərəcəsi isə 7,98% olub ki, bu da ən yüksək gəlirlilik göstəricilərindən biridir. Siyahıda üçüncü yerdə 227 milyon 449 min manatlıq əmanət həcmi və 7,32%-lik orta faiz dərəcəsi ilə Gəncə-Daşkəsən iqtisadi rayonu yer alıb.
Ən çox əmanət cəlb edən digər regionlar arasında Quba-Xaçmaz (140 milyon 809 min manat həcm və 6,58% faiz) və Lənkəran-Astara (133 milyon 613 min manat həcm və 6,43% faiz) iqtisadi rayonları da var.
Tələbli əmanətlər üzrə ən böyük həcm 3 milyard 425 milyon 744 min manat ilə Bakıda cəmləşib (0,54% orta faiz). Müddətli depozitlər üzrə də paytaxt 5 milyard 400 milyon 425 min manat ilə liderdir, lakin 10,25%-lik orta faiz dərəcəsi ən aşağı göstəricilərdən biridir.
