Aran iqtisadi rayonu

Pambıq yarışında Bərdə rayonu öndədir

Pambıq yarışında Bərdə rayonu öndədir | FED.az
15:09 25 Okt 2018

Ötən əsrin 70-80-ci illərində ölkədə pambıq istehsalında öndə gedən Bərdə əməkçiləri bu ənənəni davam etdirmək əzmindədirlər. Bu il 9630 hektarda pambıq becərən bərdəli “ağ qızıl” ustaları gərgin zəhmət hesabına yetişdirilmiş məhsulun toplanışını da nümunəvi təşkil edirlər.

Bərdə Rayon Statistika İdarəsinin rəisi Əlövsət Məmmədov bildirib ki, bu günədək tarlalardan 17 min 274,1 ton pambıq tədarük olunub. Pambıq tarlalarının 94 faizi pambıqyığan maşınlarla, 6 faizi əllə yığılıb. Yığılan pambığın 99 faizi birinci növdür. Hər hektardan orta hesabla 17,9 sentner məhsul götürülüb ki, bu da respublikanın pambıqçılıq rayonları arasında ən yüksək göstəricidir.

Hədəf cari ildə 29 min tonadək pambıq tədarük etməkdir. Hələ tarlalarda yığılmamış məhsul çoxdur. Bərdə pambıqçıları havaların əlverişli keçməsindən istifadə edərək, hər gün orta hesabla 700-tondan çox məhsul tədarük edirlər. Yığılan pambıq əsasən “MKT İstehsalat Kommersiya” MMC-nin Bərdə filialına, “Azərpambıq” MMC-nin Bərdə pambıq istehsalı və emalı zavoduna və “P-Aqro” MMC-nin Yevlaxdakı qəbul məntəqəsinə təhvil verilir.

Qeyd edək ki, sovet dövründə Bərdə pambıqçılıq sahəsində respublikamızın ən qabaqcıl rayonlarından idi. 1981-ci ildə rayonda 28 min hektar pambıq tarlasından 126 min tona yaxın məhsul tədarük edilmişdi. Lakin 1990-cı illərdən başlayaraq bu sahəyə maraq azalmışdı. Dövlətimizin başçısının tapşırıq və göstərişləri nəticəsində rayonda pambıqçılıq yenidən inkişaf dövrünə qədəm qoyub. Rayon sakinlərinin pambıqçılıq sahəsində təcrübəsi, bölgədə olan mövcud pambıq emalı zavodlarının potensialı pambıq istehsalını artırmaq üçün stimul yaradır.

Digər xəbərlər