“Turizm şirkətlərinin fəaliyyəti ilə bağlı hər hansı lisenziya və xüsusi razılıq sənədi yoxdur. Şirkətlər bu sahədə sərbəst fəaliyyət göstərirlər”.
FED.az xəbər verir ki, bunu açıqlamasında Dövlət Turizm Agentliyinin nümayəndəsi Kənan Quluzadə deyib.
K. Quluzadə bildirib ki, Dövlət Turizm Agentliyinə ölkədən xaricə gedən turistlərin bu sahədə fəaliyyət göstərən şirkətlər və yerləşdirmə obyektləri haqqında şikayəti daxil olmayıb: “Əgər turist üçün narahatlıq və problem yaradan hallar varsa, onların hüquqları pozulursa, təbii ki, müvafiq dövlət qurumları, eyni zamanda Dövlət Turizm Agentliyinə müraciət edə bilərlər. Agentlik edilən müraciətlərin müvafiq tərəflər qarşısında qaldırılması məsələsinə baxa bilər. Amma turistlərə tövsiyə edirik ki, səfərə çıxanda şirkətdən biletlərini və göstərilən xidməti təsdiq edən sənədi tələb etsinlər. Bu halda onlar xaricə gedəndə hər hansı bir narahatlıqla üzləşməyəcəklər”.
K. Quluzadə turizm sektorunda olan qiymət və xidmətin səviyyəsinə də toxunub. O qeyd edib ki, azad bazar iqtisadiyyatı olduğu üçün dövlət qurumları bu sahədə qiymətləri tənzimləmir: “Dövlət qurumları yalnız öz tövsiyələrini verir. Biz də agentlik olaraq turizm şirkətlərinə tövsiyə edirik ki, rəqabət şəraitini nəzərə alaraq, yerli və xarici turistlər üçün sərfəli paketlər təklif etsinlər. Xidmət mütləq dərəcədə səviyyəli olmalıdır. Qiymət fərqi xidmət səviyyəsinə təsir edə bilməz. Obyektlər qiymətləri çeşidləməlidir ki, insanlar büdcəsini tənzimləyə bilsinlər. O ki qaldı qiymətlərin baha, yaxud ucuz olmasına, bazarda bir məhsulun qiyməti fərqli şəkildə olur. İnsanlar keyfiyyətli istirahət etmək istəyirlərsə, bütün dünyada belədir ki, göstərilən xidmət bahalı olur. Amma Bakı ətrafı və regionlarda ucuz xidmətlər də göstərilir. O ki qaldı dövlət tabeçiliyində olan strukturlara, onların xidməti heç də baha deyil. Məsələn, “Yanardağ” qoruğu agentliyin tabeliyindədir və orada giriş qiyməti iki manatdır. Məktəblilər üçün isə giriş 20 qəpiyə nəzərdə tutulub. Bu siyahını genişləndirmək də olar. Harada ki dövlət vasitəsilə strukturlara nəzarət edilir, orada qiymətlər yuxarı deyil. Özəl obyektlərə isə biz müdaxilə yox, tövsiyə edə bilərik ki, qiymətlər ucuz olsun”.
