FED.az xəbər verir ki, Ural Hava Yolları Moskva vilayətindəki Jukovski hava limanından Bakıya bütün uçuşları müvəqqəti olaraq dayandırıb. Qeyd edək ki, uçuşlar fevralın 17-dək dayandırılıb.
Buna səbəb Azərbaycan aviasiyasının Jukovski-Bakı marşrutu üzrə müntəzəm uçuşa icazə verməməsi olub. Uçuşların dayandırılması qərarı isə fevralın 8-nə planlaşdırılan uçuşun qəfil ləğv edilməsindən sonra verilib.
Bu məsələ ilə bağlı Rusiya Federal Hava Nəqliyyatı Agentliyi Azərbaycanın aviasiya orqanlarının uçuşun davam etməsi üçün lazımi icazə vermədiyini təsdiqləyib.
Ural Hava Yolları imtinaya görə məyus olduğunu bildirib. Aviaşirkət bəyan edir ki, o, uçuşu həyata keçirmək üçün bütün texniki imkanlara malikdir və ən yüksək təhlükəsizlik standartlarına riayət edir.
Rusiya hava nəqliyyatı tənzimləyicisi danışıqların davam etdiyi üçün Jukovski-Bakı marşrutu üzrə uçuşların dayandırıldığını təsdiqləyib. Həm Rusiya, həm də Azərbaycanın aviasiya idarələri problemi həll etmək və normal uçuş əməliyyatlarını bərpa etmək üçün fəal əlaqə saxlayır.
