Turizm

Azərbaycanda turizm reyestrinə qoşulma icbari olacaq - RƏSMİ AÇIQLAMA

Azərbaycanda turizm reyestrinə qoşulma icbari olacaq - RƏSMİ AÇIQLAMA | FED.az
10:27 28 Yan 2020

Azərbaycanda yaradılacaq turizm reyestrinə ölkədə bu sahədə fəaliyyət göstərən subyektlərin qoşulması icbari qaydada olacaq.

Eləcə də bax: Azərbaycanda turizmlə məşğul olanlar – BİR YERƏ TOPLANACAQ – REYESTR YARADILIR

FED.az xəbər verir ki, bunu  Azərbaycan Dövlət Turizm Agentliyindən deyiblər.

Agentlikdən bildiriblər ki, bu təklif yeni "Turizm haqqında" qanun layihəsində öz əksini tapıb.

“Planlarımıza uyğun olaraq turizm reyestri yay aylarına artıq hazır olacaq. Reyestrin əsas funksiyası - məlumat bazasıdır. Bu bazada turizm şirkətləri, otellər, restoranlar, sertifikatlaşmış bələdçilər, çimərlik operatorları və sair obyektlərlə bağlı məlumatlar öz əksini tapacaq. İlkin olaraq nəzərdə tutulub ki, onların reyestrdə iştirakı könüllü olacaq. Lakin yeni "Turizm haqqında" qanun layihəsində nəzərdə tutulur ki, reyestrdə qoşulma icbari olacaq. Qanun layihəsi demək olar ki, bütün dövlət qurumları ilə müzakirə olunub, rəylər, təkliflər alınıb və düzəlişlər edilib. Yaxın vaxtlarda qanun layihəsi parlamentə təqdim olunacaq”, - deyə Agentlikdən qeyd ediblər.

Əlavə olaraq bildirilib ki, turizm reyestrin qurulması qaydaları yanvarın 24 Nazirlər Kabineti tərəfindən təsdiq olunub.

“Reyestrdə kateqoriyalaşdırılma aparılacaq. Misal olaraq meyarlar var ki, hansı xidmətləri turizm agentlikləri göstərə bilirlər. Xidmətlər üzrə sıralama aparılacaq. Burada həmçinin elektron xidmətlər də olacaq ki, bu bizneslər arasında təmas yaratmağa imkan yaradacaq. Misal olaraq, turizm şirkətinə bələdçi lazım olduğu təqdirdə o bu məlumatı reyestrin bazasından əldə edə biləcək. Bu böyük bir platformadır. Faktiki olaraq söhbət turizm portalının yaradılmasından gedir”, - deyə Agentlikdən əlavə ediblər.

Apa

Digər xəbərlər

Banner