Azərbaycanın Royal Holding QSC şirkəti 9 otel tikməyi planlaşdırır.
FED.az xəbər verir ki, bunu şirkətin Baş direktoru Ramil Kərimli bildirib.
Eləcə də bax: Ən çox pul qazanan otellər - BU RAYONDADIR, SİYAHI
“Şirkətimizin öz öhdəsinə götürdüyü çox böyük iqtisadi perspektivlərə malik, genişmiqyaslı möhtəşəm layihələrindən biri – Azərbaycan Respublikasının dilbər guşəsi olan Astara rayonunda inşa olunacaq 9 ədəd oteldən ibarət “Astara beşulduzlu Otellər Kompleksi”dir. Bu Kompleksin inşa edilməsi Xəzər dənizinin sahilində, şəhər səs-küyündən uzaqda,ekoloji cəhətdən səfalı olan 100 hektar ərazidə nəzərdə tutulur və ilkin layihələndirmə işləri tam başa çatdırılıb”.
Onun sözlərinə görə, layihədə investor və icraçı qismində beynəlxalq şirkətlər də çıxış edir.
Otellər Astara şəhərinin Məşədi Əzizbəyov küçəsində tikiləcəkdir:
"Astara şəhərində tikintisi planlaşdırılan 9 ədəd 5 ulduzlu otellər kompleksi haqqında onu deyə bilərik ki, bu otellərin tikintisində əsas məqsəd, turizm sektorunun inkişafına xidmət etməsidir. Azərbaycana xarici investisiyaların cəlb edilməsi eyni zamanda öz vətəndaşlarımızın da rahat istirahət etməsinə geniş imkan və şərait yaradan vacib prioritetlərdən biridir.
Yuxarıda qeyd etdiklərimizdən əlavə olaraq, otellərimizin layihəsində, konfransların, böyük həcmli iclasların keçirilməsi üçün xüsusi zalların tikilməsi nəzərdə tutulmuşdur. Biznes gəzintilər zamanı müştərilərimizə istənilən rahatlıq və şəraitin yaradılması çox vacibdir. Əminik ki, Astara şəhərində 5 ulduzlu Otellər Kompleksi dəniz görüntüsü və panoramasından zövq almaq istəyən xarici və yerli vətəndaşlar tərəfindən müsbət qarşılanaqdır".
Hər bir otel 6 mərtəbədən və 200 nömrədən ibarət olacaqdır. Hər otelin özünə məxsus konsepsiyası nəzərdə tutulub.
Ramil Kərimli əlavə edib ki, 5 mart 2020-ci il tarixində Bakı Konqres Mərkəzində İnvestisiya layihələrin təqdimat mərasimi keçiriləcəkdir.
Marja
