Xarici valyutada ən az əmanət yerləşdirilən rayonlar açıqlanıb.
FED.az biznes və maliyyə xəbərləri portalı xəbər verir ki, regionlar üzrə xarici valyutada (dollar, avro) saxlanılan əmanətlərin ən aşağı olduğu bölgələr müəyyənləşib.
Siyahının son pillələrində, yəni xarici valyutada ən az (0,1 milyon manat) əmanətin olduğu bölgələr sırasında bir neçə rayon eyni göstəricini bölüşür. Bura Ağdam, Füzuli, Daşkəsən, Qobustan rayonları, Naxçıvan Muxtar Respublikasının Kəngərli və Culfa rayonları, eləcə də Naftalan və Xankəndi şəhərləri daxildir.
İkinci ən aşağı göstərici 0,2 milyon manat olub. Bu məbləğ Beyləqan, Ağsu, Samux, Hacıqabul rayonlarında, eləcə də Şərur, Babək və Şahbuz rayonlarında qeydə alınıb.
Üçüncü yerdə 0,3 milyon manat valyuta portfeli ilə Zərdab, Goranboy, Göygöl, Tərtər, Siyəzən və Şabran rayonları qərarlaşıb.
Daha sonra siyahıda Neftçala rayonu gəlir. Bu rayonda xarici valyutada yerləşdirilən əmanətlərin həcmi 0,4 milyon manat olub.
0,5 milyon manat göstərici ilə Sabirabad, Biləsuvar, Gədəbəy və Saatlı rayonları növbəti pillələri bölüşürlər.
Ucar, Oğuz və Astara rayonlarında əhalinin banklarda saxladığı xarici valyuta vəsaiti 0,6 milyon manat təşkil edib.
Yevlax və Ağdaş rayonları isə 0,7 milyon manat valyuta əmanəti ilə siyahıda yer alıb.
Bu qrup üzrə siyahını İmişli rayonu tamamlayır – burada xarici valyutada yerləşdirilən əmanətlərin həcmi 0,9 milyon manat olub.
