Bu ilin sentyabrın 1-nə ümumilikdə iqtisadi rayonlara 24,7 milyard manat kredit verilsə də, bəzi regionlar həm ən sərfəli faizlərlə, bəzi regionlar isə kredit həcminin azlığı ilə diqqət çəkir.
FED.az Azərbaycan Mərkəzi Bankının açıqladığı son statistikaya xəbər verir ki, ən sərfəli şərtlərlə kreditləşmədə mütləq lider Bakı iqtisadi rayonudur.
Paytaxtda orta faiz dərəcəsi cəmi 14,09% təşkil edir. Siyahıda sonrakı yerləri Naxçıvan (15,35%), Abşeron-Xızı (16,80%), Gəncə-Daşkəsən (17,90%) və Quba-Xaçmaz (18,19%) iqtisadi rayonları tutur.
Kreditləşmənin həcminə gəldikdə isə bəzi regionlar bu prosesdən demək olar ki, kənarda qalıb. Şərqi Zəngəzur iqtisadi rayonu cəmi 12 milyon 53 min manatla ən az kredit cəlb edən regiondur. Bu göstəriciyə görə sonrakı yerləri Dağlıq Şirvan (200 milyon manat) və Mil-Muğan (320,5 milyon manat) tutur.
Qısamüddətli kreditlər: Ən ucuz faizlər yenə Bakı və Naxçıvandadır
Bu kateqoriya üzrə də ən aşağı faiz dərəcəsi Bakı iqtisadi rayonunda (14,08%) qeydə alınıb. Ondan sonrakı yerlərdə Naxçıvan (14,39%) və Şərqi Zəngəzur (15,04%) gəlir.
Qısamüddətli kreditlərin həcminə görə ən aşağı göstərici isə yenə də Şərqi Zəngəzurda (4,1 milyon manat) olub. Siyahıda daha sonra Dağlıq Şirvan (6,6 milyon manat) və Şirvan-Salyan (11,8 milyon manat) qərarlaşıb.
Uzunmüddətli kreditlər: Bakı liderliyi qoruyur
Kredit portfelinin əsasını təşkil edən uzunmüddətli kreditlər üzrə də ən sərfəli şərtlər Bakı iqtisadi rayonunda (14,09%) təklif olunur. Bu göstəriciyə görə paytaxtı Naxçıvan (15,38%) və Abşeron-Xızı (16,86%) iqtisadi rayonları izləyir.
Bu sahədə ən az kredit cəlb edən regionlar isə Şərqi Zəngəzur (7,9 milyon manat), Dağlıq Şirvan (193,5 milyon manat) və Mil-Muğan (299,9 milyon manat) iqtisadi rayonlarıdır.
Ümumilikdə analiz göstərir ki, Bakı bütün kredit növləri üzrə ən ucuz faizləri təklif edir, Naxçıvan isə həm kredit həcminin azlığı, həm də sərfəli faizləri ilə seçilir.
