Azərbaycanda əhalinin restoran və kafelərə ən çox vəsait xərclədiyi rayon və şəhərlər açıqlanıb.

FED.az biznes və iqtisadiyyat xəbərləri portalı xəbər verir ki, 2025-ci ilin ilk 9 ayında ölkədə iaşə dövriyyəsi 1 milyard 990 milyon manat təşkil edib. Ölkə üzrə adambaşına orta iaşə dövriyyəsi 194 manatdır. Araşdırmanın 9 ay üzrə olduğunu nəzərə alanda əhalinin restoran şəbəkəsində aylıq xərci adambaşına 21,5 manat təşkil edir. 

Amma ayrı-ayrı rayon və şəhərlərdə adambaşına düşən iaşə dövriyyəsi fərqlidir.

Bu göstəriciyə görə, ölkədə ilk yeri Naftalan şəhəri tutur – adambaşına 940 manat (aylıq 105 manat). Naftalanın siyahıda ilk yeri tutmasının səbəbi şəhərin əhalisinin azlığı, eyni zamanda buradakı sanatoriyalara gələnlərin iqtisadi aktiv olmasıdır.

Siyahıda ikinci yeri paytaxt Bakı şəhəri tutur – adambaşına 590 manat (aylıq 65 manat). Turizm şəhəri olan Qəbələ (234 manat – aylıq 26 manat), əhali sayının hələlik az olduğu Xankəndi (218 manat – aylıq 24 manat), Xızı (197 manat – aylıq 21 manat) və Şuşa şəhərindən (192 manat – aylıq 20 manat) sonra digər bütün rayonlarda bu göstərici 9 ayda 150 manatdan (aylıq 17 manat) aşağıdır.

Yeni məskunlaşmağa başlayan rayonları nəzərə almadan cəmi 22 rayon və şəhərdə bu göstərici 100  manatdan yuxarıdır. 38 rayonda isə bu göstərici 16-87 manat arasındadır.

Adambaşına restoran xərclərinin ən aşağı olduğu rayonlar – Daşkəsən (9 ayda 16 manat – aydı 2 manat), Lerik (26 manat – ayda 3 manat), Sabirabad (32 manat – aylıq 3,6 manat), Şəmkir (35 manat – aylıq 4 manat) və Zərdabdır (36 manat – aylıq 4 manat).

İaşə xərclərinin adambaşına göstəricisi cədvəldədir: