Azərbaycanın 2-ci böyük şəhəri, Qərb bölgəsinin iqtisadi mərkəzi Gəncədə orta aylıq əmək haqları açıqlanıb.
FED.az xəbər verir ki, 2022-ci ilin yanvar-noyabr aylarında Gəncədə muzdla çalışan (yəni əmək müqaviləsi ilə işləyən) işçilərin orta aylıq nominal əməkhaqqı 615,7 manat təşkil edib.
Rəsmi məlumatlara görə, son bir ildə şəhərdə orta aylıq maaş şəhər üzrə 13,8 faiz artıb.
Gəncə şəhər Statistika idarəsinin məlumatına görə, Gəncədə özəl sektorda çalışanların əmək haqqı olduqca aşağıdır.
Belə ki, dövlət sektorunda çalışanlar üzrə orta aylıq əmək haqqı 666,6 manat olduğu halda, özəl sektorda bu rəqəm cəmi 532,4 manat təşkil edib.
Maaşlardakı fərq özünü əmək haqlarının artım sürətində də göstərib.
Belə ki, şəhərdə son bir ildə dövlət sektorunda orta əmək haqqı 20%, yəni orta hesabla təqribən 115-120 manat artdığı halda, özəl sektorda maaş artımı cəmi 4,3% və ya təqribən 20-25 manat olub.
